Aqordada eldiń áleýmettik-ekonomıkalyq damýynyń 9 aıdaǵy qorytyndysy talqylanyp, aldaǵy kezeńniń mindetteri anyqtaldy
ASTANA. Qazannyń 19-y. QazAqparat - Elbasy Nursultan Nazarbaev búgin Qazaqstannyń barlyq aımaqtarynyń ákimderimen jumys keńesin ótkizdi. Onda elimizdiń aǵymdaǵy jyldyń 9 aıyndaǵy áleýmettik-ekonomıkalyq damý qorytyndysy talqylanyp, aldaǵy kezeńdegi mindetter anyqtaldy.
Elbasy óz sózinde, elimizdiń ekonomıkasy ósýdiń jaqsy qarqynyn kórsetip otyrǵanyn atap kórsetti Jalpy ishki ónim 7,5 paıyzǵa artty. Ónerkásiptik óndiris 10 paıyzǵa ósti, onyń ishinde: óńdeý ónerkásibinde - 20 paıyzǵa, hımııa ónerkásibinde - 77 paıyzǵa, mashına jasaý salasynda - 56 paıyzǵa ósim bar. Jyldyń basynan beri 200 myń jańa jumys orny quryldy. Osynyń barlyǵy durys tańdalǵan strategııanyń, júıeli júrgizilip otyrǵan daǵdarysqa qarsy sharalardyń jáne jınaqtalǵan óz qarajatymyzdyń esebinen ekonomıkaǵa kórsetilgen qýatty qarjylaı kómektiń arqasynda múmkin bolyp otyr. Daǵdarys, Qazaqstannyń - qýatty - jáne qabiletti memleket ekenin kórsetti.
«Elimizdiń barlyq óńirlerinde ekonomıka ósiminiń joǵary qarqyny baıqalýda. Barlyq aımaqtarda halyqtyń aqshalaı tabysy 10 paıyzdan 30 paıyzǵa deıin ósti. Bólshek taýar aınalymynyń kólemi artty. Osynyń barlyǵy jergilikti atqarýshy bıliktiń jumysynyń nátıjesi», - dep atap kórsetti Nursultan Nazarbaev óz sózinde.
Prezıdent sondaı-aq, aýyl turǵyndaryna júıeli memlekettik qoldaý kórsetý men agrarlyq sektorǵa ilgerindi tehnologııalardy jedeldetip engizý isi óz jemisin berip otyrǵanyn aıtty. Nátıjesinde, bıylǵy qurǵaqshylyqqa qaramastan, 13,7 mıllıon tonna astyq jınalyp otyr. Onyń ishinde elimizdiń eksporttyq áleýeti 7 mıllıon tonnany quraıdy. Oǵan qosa, byltyrǵydan 25 paıyzǵa artyq kúrish jınaldy. Qurǵaqshylyqtan zardap shekken sharýashylyqtar óz problemalarymen jeke qalyp qoıǵan joq. Olarǵa 1,5 mıllıard teńge kóleminde demeýqarjy bólinip otyr. Nesıeler, tuqymdyq ssýdalar jáne lızıngilik tólemder boıynsha olardyń merzimderi uzartylýda.
Prezıdenttiń tapsyrmasy boıynsha sondaı-aq úlestik salymshylardyń problemalary, basqa da áleýmettik máseleler sheshimderin tabýda: jyldyń basynan beri zeınetaqylar, stıpendııalar, bıýdjet salasy qyzmetkerleriniń jalaqylary kóterildi. Oǵan qosa, bıyl 37 mektep salyndy, 10 iri medıtsınalyq mekeme ashyldy. Bir jylǵa jeter-jetpes ýaqyttyń ishinde 457 jańa balabaqsha men mektep jasyna deıingi balalardy daıyndaıtyn shaǵyn ortalyqtar ashyldy. «Osynyń barlyǵy halyq úshin, qarapaıym azamattar úshin jasalyp jatyr jáne birliktiń, turaqtylyqtyń arqasynda múmkin bolyp otyr», -dep atap kórsetti Nursultan Nazarbaev óz sózinde.
Prezıdent sondaı-aq, jaqyn arada Qazaqstanda ótetin birqatar mańyzdy sharalarǵa, onyń ishinde EQYU sammıtine, VII qysqy Azııalyq oıyndarǵa toqtaldy. Oǵan qosa, kelesi jyly qazaqstandyqtar el Táýelsizdiginiń 20 jyldyǵyn atap ótedi.
Prezıdent ákimderge osynaý ataýly oqıǵalardy keńinen nasıhattaýǵa zor mańyz berýdi tapsyrdy.
