Aqordada anyqtamalyq-aqparattyq bilim beretin «Qazaqstan tarıhy» veb-portaly tanystyryldy

ASTANA. 24 qyrkúıek. QazAqparat - Búgin Aqordada QR Memlekettik hatshysy Marat Tájınniń tóraǵalyǵymen ulttyq tarıhty zerdeleý jónindegi vedomstvoaralyq jumys tobynyń úshinshi otyrysy ótýde.

Jıyn barysynda Qazaqstannyń kóne dáýirinen búginine deıingi ulttyq tarıhyna arnalǵan jańa anyqtamalyq -qparattyq bilim beretin «Qazaqstan tarıhy» veb-portaly tanystyryldy. QR Mádenıet jáne aqparat mınıstri Muhtar Qul-Muhammedtiń atap ótýinshe, sońǵy 5 jylda elimizde jaryq kórgen tarıhı shyǵarmalar osy portalǵa ornalastyrylǵan. «Sizdiń tapsyrmańyz boıynsha biz respýblıkadaǵy barlyq memlekettik tapsyrys alatyn baspalardyń bárinde shyqqan kitaptardy jınaqtap, osy tarıhqa arnalǵan portalǵa berip otyrmyz. Sonyń negizinde qazirdiń ózinde respýblıkadaǵy keıingi 5 jyldyń ishinde tarıhı taqyrypta jazylǵan shyǵarmalardyń barlyǵy memlekettik tapsyryspen osy portalǵa ótkizildi», - dedi M. Qul-Muhammed Memlekettik hatshyǵa qarata. Aıta keteıik, portal qazaq, orys jáne aǵylshyn tilinde usynylyp otyr. Onda 6739 materıal bar. Onyń 2608-i orys, 2520-sy qazaq tilinde bolsa, 1611-i aǵylshyn tilinde.