Aqorda saıtyndaǵy Prezıdenttiń derbes paraqshasynda «Halyqaralyq bedel» fotoalbomy usynyldy (FOTO)
ASTANA. QazAqparat - Prezıdenttiń derbes paraqshasynda «Halyqaralyq bedel» fotoalbomy usynyldy. Onda ár jyldardaǵy halyqaralyq forýmdarda túsirilgen sýretter bar.
Bul kadrlar Qazaqstannyń syrtqy saıası qyzmetiniń mańyzdy kezeńderinen, onyń ishinde Nursultan Nazarbaevtyń bastamasymen qurylǵan uıymdar men qoǵamdastyqtardyń evolıýtsııasynan syr shertedi, dep jazylǵan Aqordanyń feısbýktegi paraqshasynda.
«Qazaqstan barǵan saıyn halyqaralyq arenadaǵy kórnekti jáne bedeldi oıynshyǵa aınalyp keledi.
Memleket basshysy Nursultan Nazarbaev - ǵalamshardyń meılinshe mańyzdy konferentsııalary men forýmdarynyń mindetti túrdegi qatysýshysy. Qazaqstan Prezıdenti únemi BUU Bas Assambleıasynyń, ıAdrolyq qaýipsizdik jónindegi sammıttiń, Davostaǵy Búkilálemdik ekonomıkalyq forýmnyń jáne ózge de bedeldi halyqaralyq basqosýlardyń bıik minberlerinen sóz sóıleıdi.
Oǵan qosa, Qazaqstannyń ózi de eń joǵary deńgeıdegi sharalardy ótkizedi. Oǵan 2010 jylǵy jeltoqsanda ótken EQYU-nyń Astana sammıti, 2011 jylǵy maýsymdaǵy IYU SІMK 38-shi sessııasy jáne ózge de sharalar mysal bola alady.
Qazaqstan Prezıdenti quramy jaǵynan eń kórnekti qatysýshylardyń basyn qosatyn jáne halyqaralyq qoǵamdastyqtyń nazaryn eriksiz aýdaratyn forýmdardyń ótýine ózi bastamashylyq etedi. Atap aıtqanda, Astana ekonomıkalyq forýmy, Álemdik jáne dástúrli dinder kóshbasshylarynyń sezi, Eýrazııalyq medıaforým, Sheteldik ınvestorlar keńesiniń otyrysy jáne taǵy basqa sharalar.
Mundaı sharalarǵa álemdik aýqymdaǵy saıasatkerlerdiń jáne qoǵam qaıratkerleriniń qatysýy Qazaqstannyń abyroıy men bedelin arttyrady, ózge memlekettermen aradaǵy ózara túsinistik pen yntymaqtastyqtyń damýyna yqpal etedi», - dep jazylǵan Prezıdenttiń derbes paraqshasynda. 
