«Aqorda» rezıdentsııasynda balalarǵa ekskýrsııa uıymdastyryldy
ASTANA. KAZINFORM — 1 maýsym – Halyqaralyq balalardy qorǵaý kúnine oraı elimizdiń barlyq óńirinen kelgen oqýshylar Aqordada qonaq boldy.
Qazaqstan Respýblıkasy Prezıdentiniń rezıdentsııasyna oqý úzdikteri, pán olımpıadalarynyń, respýblıkalyq jáne halyqaralyq baıqaýlardyń jeńimpazdary, sport saıystarynyń júldegerleri, batyl áreketimen kózge túsken balalar keldi. Aqordanyń kishkentaı qonaqtarynyń qatarynda kópbalaly otbasylardan shyqqan, ata-anasynyń qamqorlyǵynsyz qalǵan jáne erekshe qajettiligi bar jetkinshekter de boldy.
Ekskýrsııa kezinde oqýshylar Aqordanyń ortalyq saltanatty holy men resmı qabyldaýlar ótkizýge arnalǵan zaldardy, Memleket basshysynyń kitaphanasyn, sondaı-aq rezıdentsııa aýmaǵyndaǵy baqty aralady.
Ekskýrsovodtar ǵımarat qurylysynyń tarıhy, onyń erekshelikteri men munda ótetin is-sharalarǵa baılanysty qyzyqty faktiler jaıynda málimet berdi.
Sonymen qatar oqýshylarǵa Prezıdent atynan estelik syılyqtar tabystaldy.
Óńirlerden kelgen balalar elordanyń kórikti oryndaryn da aralaıdy.
Bıyl Halyqaralyq balalardy qorǵaý kúnine arnalǵan is-sharalar algorıtmi «Qazaqstan balalary» biryńǵaı tujyrymdamasyna saı túzildi. 22 mamyrdan bastalyp 1 maýsymǵa deıin jalǵasatyn onkúndik aıasynda otbasy, qaýipsizdik, densaýlyq, bilim berý, bala quqyǵyn qorǵaý sekildi mańyzdy máselelerge basa nazar aýdaryldy.
El aýmaǵynda otbasylyq, aǵartýshylyq, qaıyrymdylyq baǵyttaryndaǵy rásimder, kórmeler, sporttyq týrnırler, ekologııalyq aktsııalar, dárigerler men psıhologtardyń qabyldaýlary uıymdastyryldy. Dekadanyń bir kúni tsıfrlyq tehnologııalardy ilgeriletýge jáne tsıfrlyq ortada balalardy qorǵaýǵa arnaldy.