Aqorda ǵımaratynda qaza bolǵan shekarashylardy aza tutýdyń belgisi retinde Qazaqstannyń týy tómen túsirildi
ASTANA. 5 maýsym. QazAqparat - Aqordanyń ǵımaratynda qosynda qaza bolǵan shekarashylardy aza tutýdyń belgisi retinde Qazaqstan Respýblıkasynyń Memlekettik týy tómen túsirildi.
Qalaladaǵy jáne elimizdiń óńirlerindegi ákimshilik ǵımarattardyń barlyǵynda tý tómen túsirildi.
Buǵan deıin habarlaǵanymyzdaı, Elbasynyń ókimimen shekarashylardyń qazaǵa ushyraýyna baılanysty búgin Qazaqstan Respýblıkasynda ulttyq aza tutý jarııalandy.
4 maýsymda QR Prezıdenti Nursultan Nazarbaev «Arqankergen» shekara beketinde oryn alǵan qaıǵyly oqıǵaǵa baılanysty málimdeme jasady.
«Almaty oblysy «Arqankergen» shekara beketinde 15 adam qaza bolǵan qaıǵyly oqıǵa qazaqstandyqtardyń eshqaısysyn da beıjaı qaldyrmady.
Meniń tapsyrmammen qazirgi kezde tergeý júrgizilýde. Oqıǵa ornynda arnaıy komıssııa jumys istep jatyr.
Mamandar men komıssııa óz qorytyndysyn jasaıtyn bolady. Biz oqıǵanyń mán-jaıyn anyqtaımyz, uıymdastyrýshylar men oryndaýshylardy tabamyz. Sóıtip bul tragedııaǵa aıyptylar tıisti jazasyn tartatyn bolady.
Shekarashylar eldiń shebin qorǵaý kezinde, qazaqstandyqtardyń tynyshtyǵy men qaýipsizdigin saqtaý qyzmetinde turǵanda qaza boldy. Olar Qazaqstannyń beıbitshiligi men bolashaǵy jolynda qyrshynynan qıyldy.
Meniń tapsyrmam boıynsha Úkimet bul kúnderi qaza tapqandardyń otbasylaryna barynsha qoldaý kórsetip, qajetti kómektiń bárin jasaýda.
Bul tragedııa qaza tapqandardyń otbasylary men aǵaıyn-týǵandaryn ǵana emes, barsha qazaqstandyqtardyń qabyrǵasyn qaıystyryp otyr.
Sondyqtan bir kúndik ulttyq qaraly kún jarııalaımyn»,-delingen málimdemede.
