«Aqnıet sút» baıqaýy 1-shi satysynyń jeńimpazdary anyqtaldy
; ALMATY. Mamyrdyń 25-i. QazAqparat /Ádilet Musahaev/ - Búgin Almatyda buqaralyq aqparat quraldarynyń arasynda ótken atalmysh saıystyń jeńimpazdary anyqtalyp, marapattaldy,
dep habarlaıdy QazAqparat.
Esterińizge sala keteıik, «Aqnıet sút» saıysy 2010 jyldyń 24 aqpany men 21 qarashasy aralyǵynda ótetini jarııalanǵan bolatyn. Osy merzim aralyǵynda sút ónimine baılanysty shyqqan materıaldar saıysqa qabyldanady. Jýrnalısterdiń jumystaryna sút salasynyń sarapshylary men tanymal jýrnalıster tórelik etedi.
«Saıys ıdeıasyn qoldaýǵa jáne áleýmettik turǵyda mańyzdy aqparat taratýǵa at salysqan BAQ ókilderine zor yqylasymdy bildirem. Ádil sarapshylar suhbatynyń jýrnalıster bastamasymen iske asyrylǵany biz úshin mańyzdy», deıdi Qazaqstan sút odaǵy atqarýshy dırektorynyń ornybasary Lıdııa Mıheeva.
Baıqaý sharttary boıynsha jýrnalıster Qazaqstandaǵy sút máseleleri men jetistikterin, sút óńdeýdiń sońǵy tehnologııasyn jáne súttiń adam aǵzasyna tıgizer paıdasyn tolyq qamtý kerek.
Sonymen «Qazaq tilinde jazylǵan úzdik maqala» atalymy boıynsha «Jas qazaq» respýblıkalyq gazetiniń tilshisi Roza Shákenova marapattalsa, «Úzdik orys tilindegi maqala» atalymyna «Vechernıı Almaty» basylymynyń jýrnalısi Natalıa Verjbıtskaıa laıyq dep tanyldy. Sondaı-aq qazylar alqasynyń uıǵarymymen «Habar» telearnasynyń jýrnalısi Elena Gorıacheva «Úzdik telearnalyq sıýjet» atalymy boıynsha marapattaldy.
