Aqnar Adaqqyzy: Usynys tússe, qazaqstandyq klýbtarda óner kórsetýge daıynmyn

MILAN. KAZINFORM – Konkımen júgirýde Qytaı quramasynyń sapyndaǵy ulty qazaq sportshy Aqnar Adaqqyzy qazaqstandyq kásipqoı sport klýbynda óner kórsetýge daıyn ekenin aıtty.

Qandasymyzdyń aıtýynsha, búginde kóptegen qazaq jastary sheteldik kásibı konkı klýbtarynda baq synap júr. Bul sportshynyń sheberligin shyńdap, deńgeıiniń ósýine zor yqpal etedi.

Aqnar Adaqqyzy Qazaqstandaǵy kásibı klýbtar tarapynan naqty usynys tússe, ony qarastyrýǵa daıyn ekenin de jasyrmady.

- Eger Qazaqstanda kásibı konkımen júgirý klýbtary usynys jasap jatsa, qarsy emespin. Qazaqstandyq sportshylardy jaqsy tanımyn. Jarystarda jıi kezdesip, birge shaı iship, áńgimelesip turamyz, – dedi ol.

Sportshynyń aıtýynsha, Qytaıdaǵy qazaq jastary arasynda qysqy sport túrlerine qyzyǵýshylyq joǵary.

– Qysqy sportqa qyzyǵýshylyǵym mektep kezinen bastaldy. Alǵashqy jattyqtyrýshym meni short-trekke baýlydy. 2020 jyly konkımen júgirýge tolyq aýysyp, Beıjiń Olımpıadasyna joldama aldym. Jalpy, Shyńjańdaǵy qazaqtar arasynda konkı men shańǵy sportyna qyzyǵatyn jastar kóp. Bolashaqta solarǵa baǵyt-baǵdar berip, halyqaralyq jarystarǵa qatysýyna kómektessem degen nıetim bar, – dedi Aqnar Adaqqyzy.

Aıta keteıik, konkıshi Aqnar Adaqqyzy — Shynjań ólkesi, Qutybı aýdanynda dúnıege kelgen. Birneshe márte Qytaı chempıony, qysqy Azııa oıyndarynyń jáne basqa halyqaralyq jarystardyń jeńimpazy.

Sonymen qatar, ol Beıjińdegi XXIV qysqy Olımpıada oıyndarynda Qytaı quramasy sapynda óner kórsetken.

Osyǵan deıin habarlaǵanymyzdaı, Aqnar Italııadaǵy qysqy Olımpıada oıyndarynda konkımen júgirýden áıelder arasynda komandalyq iz qýý jáne mass-start dodasynda baq synady.