Aqnar Adaqqyzy: Qandastardyń qoldaýyn árdaıym sezemin

MILAN.KAZINFORM – Italııanyń Mılan jáne Kortına-d’Ampetstso qalalarynda ótip jatqan XXV qysqy Olımpıada oıyndarynda Qytaı quramasy sapynda óner kórsetip jatqan qazaq qyzy qazaqstandyqtarǵa sálem joldady.

Sportshy jarystarda júrgende árqashan qandastardyń qoldaýyn sezinetinin aıtty.

- Shetelderde úlken baıraqty básekelerde júrgenimde qandastar meni tanyp, jyly lebizderin bildirip, qoldap jatady. Áleýmettik jeliler arqyly da kóptegen izgi tilekter joldanyp, sonyń bárin oqyp erekshe qýanyp qalamyn. Barshańyzdyń qoldaýlaryńyzdy árdaıym sezemin,- dedi Aqnar.

Qandasymyz qazaqstandyq jankúıerlerine sálem joldap, júrekjardy tilegin jetkizdi.

- Qanymyz qazaq qoı, shynymdy aıtsam qandastarymdy kórgende qatty qýanyp, tolqyp ketemin. Bul sportta qazaqtar kóp emes. Sondyqtan Qytaı atynan óner kórsetsem de, qazaq ultynyń namysyn abyroımen qorǵap júrgenimdi maqtan tutamyn. Qazaqstanda jankúıerlerim kóp ekenin estidim. Qoldaýlaryńyz úshin úlken raqmet! Alda bıik belesterdi baǵyndyrý úshin bar kúsh-jigerimdi salamyn,- dedi sportshy.

Aıta ketıik, Aqnar Adaqqyzy konkımen júgirýde áıelder arasynda komandalyq iz qýý jáne mass-start dodasynda baq synady.

Osyǵan deıin, qandasymyz 2029 jyly Almatyda ótetin qysqy Azııa oıyndaryna qatysqysy keletinin aıtqan bolatyn.