Ákimshilik isterde biryńǵaı tártip qalyptaspaq
ASTANA. KAZINFORM — Joǵarǵy Sotta ákimshilik ister boıynsha zańdylyqty nyǵaıtýǵa, sot praktıkasyn birizdendirýge jáne protsestik talaptardy naqtylaýǵa baǵyttalǵan normatıvtik qaýly jobasy talqylandy.
Qazaqstan Respýblıkasy Joǵarǵy Sotynda «Ákimshilik quqyq buzýshylyq týraly ister boıynsha protsestik zańnamany qoldanýdyń keıbir máseleleri týraly» normatıvtik qaýly jobasyn talqylaýǵa arnalǵan dóńgelek ústel ótti.
Іs-sharaǵa Joǵarǵy Sottyń sýdıalary, quqyq qorǵaý organdarynyń, advokattar qaýymdastyǵynyń jáne múddeli memlekettik organdardyń ókilderi qatysty.
Talqylaýdyń negizgi maqsaty — ákimshilik quqyq buzýshylyq týraly isterdi qaraý kezinde protsestik normalardy qoldanýdyń biryńǵaı tásilderin qalyptastyrý, sondaı-aq sot tájirıbesinde týyndaıtyn problemalyq máselelerdi sheshý.
Dóńgelek ústel barysynda jobanyń ákimshilik quqyq buzýshylyq týraly isterdi qozǵaýdyń zańdylyǵy, protsestik merzimder men laýazymdy adamdardyń ókilettikterine qoıylatyn talaptardyń saqtalýy, is júrgizýge qatysýshylardyń quqyqtaryn qamtamasyz etý jáne dáleldeý mindetin bólý máselelerine qatysty negizgi erejeleri qaraldy.
— Ákimshilik quqyq buzýshylyq týraly hattamalardy durys jasaý, sottyń árekettiń quqyqtyq saralanýyn ózgertý shekteri, protsestik talaptardy eleýli buzýdyń saldary, sondaı-aq sottylyq qaǵıdalary men isterdi qaraý merzimderin saqtaý máselelerine erekshe nazar aýdaryldy, — delingen habarlamada.
Sonymen qatar, qatysýshylar shaǵymdardy qaraý jáne sot aktilerin apellıatsııalyq jáne kassatsııalyq tártippen, onyń ishinde jańadan ashylǵan mán-jaılar boıynsha qaıta qaraý kezinde protsestik normalardy qoldaný máselelerin talqylady.
Pikir almasý barysynda sýdıalar korpýsynyń, memlekettik organdar men advokattar qaýymdastyǵynyń ókilderi quqyq qoldanýdyń ózekti máselelerin kóterip, jobaǵa qatysty usynystaryn bildirdi.
Protsestik zańnamany túsindirý men qoldanýda biryńǵaı tásilderdi qalyptastyrýdyń mańyzdylyǵy atap ótildi. Óıtkeni mundaı birizdiliktiń bolmaýy uqsas mán-jaılar boıynsha isterdiń ártúrli sheshilýine ákelýi múmkin.
Talqylaý qorytyndysy boıynsha ákimshilik quqyq buzýshylyq týraly ister boıynsha quqyq qoldaný sapasyn arttyrýǵa, zańdylyqty nyǵaıtýǵa jáne sot praktıkasynyń birizdiligin qamtamasyz etýge baǵyttalǵan normatıvtik qaýly jobasyna qatysty usynystar ázirlendi.
