Ákimshilik raqymshylyqqa kimder iligýi múmkin

ASTANA. KAZINFORM – Senat depýtaty Marat Qojaev ákimshilik raqymshylyqqa kimderdiń iligýi múmkin ekenin aıtty.

- Ákimshilik raqymshylyq alǵash ret ótkeli otyr. Elimizde ákimshilik ádiletke qatysatyn 70 sýbekt bar. Meniń bilýimshe, qazir barlyq taraptan usynystar jınaqtalyp jatyr. Talqylaýlar barysynda raqymshylyqqa eń aldymen halyqtyń áleýettik osal toby iligýi kerek degen usynystardy estip jatyrmyn. Eger bar bolsa olar eńbek, soǵys ardagerleri, sonymen qatar múmkindigi shekteýli azamattar, kópbalaly otbasylar jáne basqalary, - dedi senator Parlament palatalarynyń birlesken otyrysynan keıin.

Sondaı-aq ol aıyppuldardy esepten shyǵarǵannan keıin bıýdjettiń qansha qarajattan qaǵylý múmkindigine qatysty pikirin bildirdi.

- Ondaı qaýip bar. Biraq, aıyppul belgileý – bul eń aldymen bıýdjetti tolyqtyrý emes, quqyq buzýshylyqtyń aldyn alý joly, - dedi Marat Qojaev.

Buǵan deıin Premer-mınıstr raqymshylyq jasaý tetikteri boıynsha usynys ázirleýdi tapsyrǵan edi.

— Keshe Prezıdent jańa Konstıtýtsııanyń qabyldanýyna baılanysty azamattar men memlekettiń qaýipsizdigine qater tóndirmeıtin birqatar quqyq buzýshylyq boıynsha raqymshylyq jasaý týraly bastama kóterdi. Ákimshilik ister boıynsha raqymshylyq týraly bastama el tarıhynda alǵash ret kóterilip otyrǵanyn atap ótemin. Іshki ister jáne Ádilet mınıstrlikteri Bas prokýratýramen birlesip, eki apta ishinde raqymshylyq jasaý tetikteri boıynsha egjeı-tegjeıli usynys engizsin, — dedi Premer-mınıstr.