Ákimshilik raqymshylyq 21 mlrd teńge aıyppuldy esepten shyǵarýǵa múmkindik beredi
ASTANA. KAZINFORM — 500 myńnan astam adam pen 2 myńnan astam bıznes sýbektisi ákimshilik raqymshylyqqa iligedi.
Búgin Májilistiń jalpy otyrysynda depýtattar ákimshilik raqymshylyq aıasynda qamtylatyn kásipkerler men jalpy qansha somadaǵy aıyppul esepten shyǵarylatynyn surady.
QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń tóraǵasy Sábıt Nurlybaıdyń aıtýynsha, ákimshilik raqymshylyq aıasynda jalpy 1,47 mıllıonǵa jýyq ákimshilik quqyq buzý deregi jabylady. Bul turǵyda jalpy somasy 21,1 mıllıard teńge aıyppul esepten shyǵarylady.
- Memlekettik kirister komıteti boıynsha jalpy somasy 446 mıllıon teńgeni quraıtyn 4 myńnan astam, Ádilet mınıstrligi baǵytynda 16 mıllıon teńgeni quraıtyn 561 quqyq buzý deregi qamtylsa, al basqa vedomstvolar boıynsha jalpy somasy 500 mıllıon teńgeden astam 3 myńǵa jýyq quqyq buzý deregi qamtyldy, - dedi S. Nurlybaı.
Óz kezeginde QR Іshki ister mınıstriniń orynbasary Sanjar Ádilov ІІM boıynsha 500 myńnan astam adam ákimshilik raqymshylyqpen qamtylatynyn aıtty.
- 17 mlrd teńgeden astam somaǵa 1 mln-nan astam aıyppul esepten shyǵarylady. Esirtki men qarýdyń zańsyz aınalymyna, sot sheshimderine, qaıtalama sheshimderge, jol qozǵalysy erejelerin qasaqana buzýǵa, sondaı-aq azamattarymyzdyń qaýipsizdigine qater tóndiretin áreketterge baılanysty ákimshilik quqyq buzýshylyqtarǵa raqymshylyq qoldanylmaıtynyn atap ótken jón, - dedi S. Ádilov.
Qarjy vıtse-mınıstri Erjan Birjanovtyń sózine qaraǵanda, raqymshylyqtyń jeke baptary boıynsha 2370-ke jýyq kásipkerlik sýbektisi qamtylýy múmkin.
- Raqymshylyq memlekettik satyp alýmen baılanysty zań buzý derekterin, sondaı-aq salyq salynatyn nyasandardy qasaqana jasyrýmen baılanysty salyq zańnamasyn buzý áreketterin qamtymaıtynyn atap ótkim keledi», - dedi vıtse-mınıstr.
Budan buryn habarlanǵandaı, bıyl 15 myń qylmystyq jazasyn óteýshige raqymshylyq jasalady.
