Ákimshilik daýlardy sheshýde júıelilik qajet – Prezıdent
ASTANA. KAZINFORM – Ákimshilik ister boıynsha sot tájirıbesi memlekettik apparat jumysynyń sapasyn aıqyndaıtyn synaq boldy. Onyń nátıjesi sotqa senimniń arta túskenin kórsetti. Bul týraly Prezıdent Qasym-Jomart Toqaev elordada «Ákimshilik ádilet jáne onyń quqyq ústemdigin qamtamasyz etýdegi róli» atty halyqaralyq forýmda aıtty.
– Ákimshilik ádilet róli nyǵaıyp keledi. Keı azamattar sottardyń sheshimine narazylyqtaryn bildirip, úmitteri aqtalmaǵandaryn alǵa tartady. Bul buǵan deıin de bolǵan, qazir de kezdesedi. Mundaı shaǵymdardyń kóbi ókpe-renishke nemese birjaqty pikirge qurylady. Biraq qandaı jaǵdaı bolsa da mundaı pikirlerdi tekserip, ádil sheshim qabyldaý kerek, – dedi Prezıdent.
Sondyqtan Memleket basshysy jańa Konstıtýtsııada ákimshilik sot tóreligin sot isin júrgizýdiń derbes nysany retinde bekitýdiń mańyzy zor ekenin jetkizdi.
Kún tártibinde sotqa shaǵymdanýdyń qasań modelin sot isin júrgizý táýekelderin strategııalyq basqarýǵa aýystyrý qarastyrylyp otyr. Úkimet qazirdiń ózinde tıisti erejelerdi ázirledi.
– Endi ortalyq jáne jergilikti deńgeıde ákimshilik aktiler men rásimderdiń birizdiligin qamtamasyz etý qajet. Buryn kelip túsken shaǵymdar men ótinishterde qaralǵan máseleler qaıtadan sottaǵy daý-damaı nysanasy bolmaýy kerek. Ákimshilik tájirıbeniń júıeliligi men turaqtylyǵyn qamtamasyz etý qajet, – dedi Qasym-Jomart Toqaev.Jarııa quqyqtyq sıpattaǵy daý-damaıdy ákimshilik sot tóreligi deńgeıine berý boıynsha aýqymdy jumys atqarylýda.
Byltyr bul qosymsha quqyqtyq-normatıvtik aktilerdiń zańdylyǵyn qaraıtyn isterdi qamtydy. Buǵan deıin mundaı daý-damaıǵa qatysty sheshim azamattyq is júrgizý normalaryna sáıkes qabyldanyp kelgen.
Buǵan deıin habarlanǵandaı, forým barysynda Prezıdent memleket pen qoǵam tutastyǵyn nyǵaıtý aldyńǵy qatarly mindettiń biri ekenin atap ótti.
