Aqmolanyń Jarqaıyń aýdany 417 myń tonna astyq eksporttady
KÓKShETAÝ. QazAqparat-Jarqaıyń aýdany 417 myń tonna astyq eksporttady. Bul týraly aýdan ákimi Murat Balpan halyqqa esep berý kezdesýinde atap ótti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Aqmola oblysy ákiminiń orynbasary Asqarbek Úısimbaevtyń qatysýymen ótken kezdesýde aýdan basshysy bıylǵy jyl Elbasynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy halyqtyń bolashaqqa degen senimi nyǵaıǵanyn atap ótti.
Murat Balpan óz baıandamasynda óńir damýynyń basym baǵyttaryna keńirek toqtalyp, 2017 jyl aýdan úshin nátıjeli jetistikterge, mańyzdy oqıǵalarǵa toly jyl bolǵandyǵyn atady. Sondaı-aq, jumyssyzdyq deńgeıi tómendep, áleýmettik nysandar boı kótergenin tilge tıek etti.
«Ótken jyly aýyl sharýashylyǵy ónimderiniń jalpy ónimi 26,9 mıllıard teńgeni qurap, 584 myń tonna astyq jınaldy. Sońǵy bes jylda aýdannyń egistik alqaptarynyń kólemi - 94 myń gektarǵa ulǵaıyp, 622,5 myń gektarǵa jetti. Astyq halyqaralyq suranysqa ıe. Atap aıtqanda, sońǵy úsh jylda 417 myń tonna astyq eksporttaldy», - dedi aýdan ákimi.
Egin sharýashylyǵynda alǵa basý baıqalǵanymen mal sharýashylyǵy salasynda jumysty shıratý qajet etedi.
«Osy rette, sút-taýarlary fermasy, sút óńdeý tsehy, et kombınaty, mal bordaqylaý alańdary men mal soıý pýnktterin ashý josparǵa engizilgen. Kommýnaldyq salada bıylǵy jyly Derjavınsk qalasynda jylytý qazandyǵy salynbaq, osy istiń nátıjesinde 7 kóp qabatty úı, áleýmettik nysandar, 5 saýda úıi ortalyqtandyrylǵan jylý berý júıesimen qamtylady», dep sózin qorytyndylady aýdan ákimi.
Kezdesýde turǵyndar tarapynan qoıylǵan jylý júıesine qosylý, qoǵamdyq kólik marshrýty, jol qurylysy sapasyn qadaǵalaý boıynsha qoǵamdyq komıssııa qurý, «Masaly TKBK» ashylýy boıynsha suraqtarǵa aýdan basshysy naqty jaýaptar berdi.
Jaryssózge aýdannyń qurmetti azamaty Borıs Shvachkın, «Kostychev» JShS dırektory Balǵabaı Qabjanov, jas ustaz Zınat Myqtybekova, jeke kásipker Sergeı Fıllıpýk qatysty.
Kezdesý sońynda «Derjavınskaıa Agropromtehnıka» JShS dırektory Valentın Sıdorov «Eren eńbegi úshin» medalimen, «SHP Otradnyı» JShS dırektory Qasym Qojabekov Aqmola oblysy ákiminiń qurmet gramotasymen marapattaldy. Sonymen qatar, aýdannyń áleýmettik-ekonomıkalyq damýyna úles qosqan jerlesterine ákim alǵys hattaryn tabys etti.
