Aqmolanyń keı aýdandarynda aptap ystyqqa baılanysty tótenshe jaǵdaı jarııalanýy múmkin
KÓKShETAÝ. QazAqparat –Jaýyn-shashynnyń bolmaýynan aqmolalyq agrarlar dabyl qaǵyp otyr. Óıtkeni egin jáne malǵa arnalǵan jemshóp bazasyna qaýip tónip tur, dep habarlaıdy QazAqparat tilshisi.
«Nur Otan» partııasy Aqmola oblystyq fılıaly janyndaǵy agrarlyq sektordy damytý jónindegi qoǵamdyq keńes músheleri mundaı jaǵdaıda ne isteý kerektigin talqylady.
«Qazgıdromet» RMK Aqmola oblysy boıynsha fılıalynyń derekterine sáıkes mamyr-maýsym aılarynda aýdandar boıynsha túsken jaýyn-shashynnyń ortasha aılyq mólsheri -13,1 jáne 19,1 mm qurady.
Bul normadan 2 ese tómen (norma 33-35 mm). Al bul dándi jáne burshaqty daqyldar egistikteriniń aǵymdaǵy jaǵdaıyna áser etti.
Keıbir aýdandarda jaýyn-shashyn tipten jaýǵan joq.
Aqmola oblysy aýyl sharýashylyǵy basqarmasy basshysynyń mindetin atqarýshy Erkesh Álenov 2021 jylǵy 8 shildedegi jaǵdaı boıynsha 1,8 mln ga jer, ıaǵnı 40% aýmaq jaqsy jaǵdaıda, 2,5 mln ga jer, ıaǵnı 55% aýmaq qanaǵattanarlyq, 228,1 myń ga jer, ıaǵnı 5% aýmaq nashar jaǵdaıda ekenin atap ótti.
Ereımentaý, Qorǵaljyn, Atbasar, Jaqsy jáne Esil aýdandarynda jaǵdaı alańdatarlyq.
