Aqmolanyń bas sanıtarlyq dárigeri kásipkerlerdi karantın talaptaryn qatań saqtaýǵa shaqyrdy
Oblystyq sanıtarlyq-epıdemıologııalyq baqylaý departamentiniń basshysy Aınagúl Mýsınanyń aıtýynsha, óńirdegi Ashyq baǵdarlamasynyń jumysy qanaǵattanarlyqsyz. Óńirdegi «Ashyq»-tiń 5000 qatysýshysynyń 2400-den astamy-aýtsaıderler.
«Qurmetti kásipkerler, qazir jaǵdaı óte kúrdeli. Koronavırýs ınfektsııasyn juqtyrǵandardyń sany tórt kúnniń ishinde 27-den 290 jaǵdaıǵa deıin kúrt óskeni baıqalady jáne kún saıyn olardyń sany eksponentsıaldy túrde artýda. Belgileri men taralý jyldamdyǵy boıynsha bul omıkron shtamyna tán, biraq delta men brıtandyq shtamdar da parallel júrip jatyr. PTR-test tapsyrmaı - aq, tik júrip aýyratyndar kóp. Sol sebepti, koronavırýs ınfektsııasynyń taralýynyń aldyn alý maqsatynda barlyq kásipkerler karantın talaptaryn qatań saqtap, kelýshilerdiń mártebesin muqııat tekserýdi qamtamasyz etýi tıis», - dedi A.Mýsına.
Aımaqtyń bas memlekettik dárigeri atap ótkendeı, koronavırýs ınfektsııasynyń taralýyn tejeý úshin baılanystardy shekteý kerek. Ár adam maska rejımin saqtap, jeldetý, kvartstaý, áleýmettik qashyqtyqty saqtaý, kópshilik jınalatyn oryndarǵa barmaý, otbasylyq is-sharalar men basqa da saltanattardy ótkizbeý, basqa qalalar men jaqyn mańdaǵy eldi mekenderge shuǵyl sebepsiz barmaý sııaqty karantın talaptaryn saqtaýy kerek.
«Koronavırýs ınfektsııasyna qarsy ekpe almaǵan adamdarǵa vaktsınatsııalaý qajet. Bizde oblys boıynsha birinshi komponentpen qamtý bar bolǵany 70 paıyzdy quraıdy, bul respýblıkamen salystyrǵanda 10 paıyzǵa az. Birinshi jáne ekinshi komponent arasynda 6 paıyz úlken alshaqtyq bar, kóbisi ekinshi komponentti almaǵan, demek olarda qajetti ımmýnıtet joq», - dep tolyqtyrdy A.Mýsına.
Eske sala keteıik, qańtardyń 14-nen bastap Aqmola oblysy aýmaǵynda karantın sharalardy kúsheıtý týraly jańa qaýlysy shyqty.
