Aqmolanyń bes aýdanynyń turǵyndaryna kúrdeli operatsııalardy alý múmkindigi týdy
ASTANA. KAZINFORM - Aqmola oblysynyń bes aýdanyndaǵy 106 myńnan astam turǵyn endi oblys ortalyǵyna barmaı-aq, kúrdeli operatsııalar men mamandandyrylǵan medıtsınalyq kómekti Atbasar kópbeıindi aýdanaralyq aýrýhanasynan ala alady, dep habarlaıdy QR Densaýlyq saqtaý mınıstrliginiń baspasóz qyzmeti.
Memleket basshysynyń tapsyrmasy boıynsha «Aýyldyq densaýlyq saqtaýdy jańǵyrtý» ulttyq jobasy aıasynda jańǵyrtýdan ótken aýrýhananyń jumysymen Densaýlyq saqtaý mınıstri Aqmaral Álnazarova tanysty.
Jańǵyrtý nátıjesinde aýrýhanadaǵy tósek sany 154-ten 172-ge deıin ulǵaıtyldy. Kardıohırýrgııa, neırohırýrgııa, endokrınologııa, ýrologııa jáne balalar hırýrgııasy sııaqty jańa baǵyttar ashyldy.
Angıograf ornatylǵannan keıin munda qazirdiń ózinde 160-qa jýyq operatsııa jasaldy. Buǵan deıin jiti koronarlyq sındromy bar patsıentter Atbasardan 200 shaqyrymnan astam qashyqtyqta ornalasqan oblys ortalyǵyna jiberiletin. Endi qajetti medıtsınalyq kómekti jergilikti jerde ala alady.
Atbasar aýrýhanasy medıtsınalyq ınfraqurylymdy jańǵyrtý jáne dárigerlerdi júıeli túrde qoldaý óńirlerdegi kadr tapshylyǵy máselesin sheshýge múmkindik beretininiń naqty mysalyna aınaldy.
Sońǵy eki jylda munda 51 maman tartyldy, onyń 22-si bıyl jumysqa ornalasty. Búginde aýrýhanada 85 dáriger eńbek etedi. Mamandarǵa, onyń ishinde buǵan deıin tapshylyq bolǵan baǵyttar boıynsha qajettilik tolyq qamtamasyz etildi.
Medıtsına qyzmetkerlerine qyzmettik turǵyn úı jáne 8,5 mln teńge kóleminde áleýmettik tólemder kózdelgen.
Mınıstr bosandyrý bólimshesine de baryp, onda segiz aıdyń ishinde 270 bosandyrý júrgizilgenin kórdi. Jas analarmen áńgimelesip, jańa týǵan nárestelerge syılyqtar tabys etti. Bólimshe akýsher-gınekologtarmen tolyq jasaqtalǵan.
Sapar barysynda Aqmaral Álnazarova medıtsına ujymymen aýrýhanany odan ári damytý, dári-dármekpen qamtamasyz etý jáne medıtsınalyq kómektiń qoljetimdiligin arttyrý máselelerin talqylady.
Búginde Atbasar aýrýhanasy Aqmola oblysynyń bes aýdanynda turatyn 106 myńnan astam turǵyn úshin dıagnostıka men emdeý múmkindikterin keńeıtip, aýyl halqyna mamandandyrylǵan medıtsınalyq kómekti barynsha jaqyndatyp otyr.
Osyǵan deıin«Aýyldyq densaýlyq saqtaýdy jańǵyrtý» jobasy aıasynda medıtsınalyq nysan salý jospary 100 paıyz oryndalǵany týraly jazdyq.
