Aqmolalyqtarǵa tótenshe jaǵdaı kezinde memlekettik qyzmetterdi alý joldary túsindirildi

KÓKShETAÝ. QazAqparat - QR Sybaılas jemqorlyqqa qarsy is-qımyl agenttigi Aqmola oblysy boıynsha departamentiniń «Antikor» servıstik ortalyǵynda «Azamattarǵa arnalǵan úkimet» memlekettik korporatsııasy» KE AQ Aqmola oblysy boıynsha fılıalynyń ókilderi aqmolalyqtarǵa tótenshe jaǵdaı kezinde memlekettik qyzmetterdi alý joldaryn túsindirdi, dep habarlaıdy QazAqparat tilshisi.

Sharada fılıaldyń front-keńseleriniń qyzmetin úılestirý basqarmasynyń sarapshysy Áset Sársekeev pen Kókshetaý qalasy boıynsha Halyqqa qyzmet kórsetý jónindegi №1 bólim basshysynyń orynbasary Oksana Kosobokova koronavırýstyń pandemııasy sebebinen elde tótenshe jaǵdaıdyń engizilýine baılanysty azamattardyń elektrondyq memlekettik qyzmetterdi alý tártibi týraly aıtyp berdi.

Qazirgi ýaqytta qazaqstandyqtar memlekettik qyzmetterdi tek onlaın ala alady, sebebi Halyqqa qyzmet kórsetý ortalyqtary óz qyzmetin ýaqytsha toqtatty.

Spıkerlerdiń aıtýynsha, qazirgi tańda memlekettik qyzmettiń 80 paıyzdan astamy egov.kz portalynda qoljetimdi, sondaı-aq, keıbir qyzmetter men servıster EgovMobile mobıldik qosymshasynda, eGovKzBot2.0 telegramm-botynda jáne Facebook pen VKontakte áleýmettik jelilerinde qoljetimdi.

«Qajetti suraqtar boıynsha keńes alý úshin 1414 baılanys ortalyǵyna habarlasýǵa bolady. Budan basqa, úkimet qyzmetkerleri azamattar úshin beıneqońyraý arqyly kórsetiletin qyzmetti alýshylardy mobıldik azamattar bazasynda tirkeýdi júzege asyratyn bolady», - deıdi Oksana Kosobokova.

Sondaı-aq, fılıal ókilderi 21 naýryzǵa deıin HQKO-ǵa qujattardy tapsyryp úlgergen azamattar daıyn qujattardy berý boıynsha bir tereze ǵana jumys isteıtin HQO-da daıyn nátıje ala alatynyn atap ótti.

«Kólik quralyn qaıta tirkegen nemese júrgizýshi kýáligin onlaın aýystyrǵan avtokólik ıeleri daıyn qujattar men nómirlerdi óz qalasynyń mamandandyrylǵan HQKO-nan ala alady, onda daıyn qujattardy berý tek bir tereze arqyly ǵana jumys isteıtin bolady», - dep tolyqtyrdy Oksana Kosobokova.

Aıta ketý kerek, elektrondyq memlekettik qyzmetter sybaılas jemqorlyqtyń tómendeýine yqpal etedi. Memlekettik qyzmetterdiń sapasyn arttyrý Qazaqstannyń 2015-2025 jyldarǵa arnalǵan Sybaılas jemqorlyqqa qarsy strategııasynyń maqsattarynyń biri bolyp tabylady. Osy oraıda, mundaı tikeleı efırdiń qajettiligi sybaılas jemqorlyqqa qarsy is-qımyl máselelerinde halyqtyń sapaly quqyqtyq aqparattandyrylýyn qamtamasyz etýmen jáne saýattylyǵyn arttyrýmen baılanysty.

Sonymen qatar, qandaı da bir sybaılas jemqorlyqpen baılanysty quqyqbuzýshylyqtarǵa tap bolǵan jaǵdaıda azamattar Agenttiktiń 1424 Call-ortalyǵyna qońyraý shalyp, bul týraly habarlaı alady.