Aqmolalyqtarǵa qurban shalýdyń amaldary túsindirildi
KÓKShETAÝ. QazAqparat - Kókshetaýda musylmandardyń qasıetti merekesi Qurban aıtqa oraı jýrnalısterdiń qatysýymen brıfıng ótti, dep habarlaıdy QazAqparat tilshisi.
Óńirlik kommýnıkatsııalar qyzmetinde ótken brıfıngte QMDB-ynyń Aqmola oblysyndaǵy ókili, Naýan haziret atyndaǵy Kókshetaý ortalyq meshitiniń bas ımamy Qýanysh Sábıt óziniń jýrnalısterge arnaǵan kirispe sózinde ıslam kúntizbesindegi bul aıshyqty merekeniń tarıhy men taǵylymy jaıly aıtyp berdi. Osy merekede oryndalatyn eń basty rásim - Qurban shalý paryzyn oryndaýdyń amaldaryn da tilge tıek etti.
Jýrnalıster nazaryn shalynatyn maldyń jáne kimder qurban shala alady degen saýalǵa aýdara otyryp, bıyl qurban shalatyndar úshin qalamyzdaǵy arnaıy mal soıý oryndary daıyndalǵanyn jáne osyǵan baılanysty is-sharalar ótkizetinin atap kórsetti.
Mal soıý rásimderi Kókshetaý qalasyndaǵy «Bıjan» et óńdeý kesheni men «Áz» mal bazarynda júzege asyrylady.
«Qurban aıttyń alǵashqy kúni tańǵy saǵat 8,00-de oblystyń barlyq meshitterinde aıt namazy oqylady. Osy namazdan keıin qurban shalýshylar qurban shalý rásimderin bastaıdy.
31 tamyz kúni meshit janyndaǵy jańadan ashylǵan shashtarazda oqýshylarǵa aıttyń jáne bilim kúniniń qurmetine oraı tegin shash alý uıymdastyrylady. Osy kúni oraza ustaýshylarǵa ortalyq meshitte aýyzashar ótkiziledi. Aıt kúnderi «Meıirimdi júrek jylýy» atty qaıyrymdylyq aktsııasy aıasynda muqtaj jandarǵa et taratylady. Sonymen birge, 2 qyrkúıekte oblys ortalyǵynda bilim alyp júrgen stýdentterge aıt shaıy uıymdastyrylmaqshy», - dedi ımam.
