Aqmolalyqtardyń ıpoteka boıynsha bereshegi 26,4 mlrd teńgeni qurady

KÓKShETAÝ. QazAqparat - Aqmolalyqtardyń ıpotekalyq nesıeleri boıynsha bereshegi 26,4 mıllıard teńgeni qurady. Bul týraly óńirlik kommýnıkatsııalar qyzmetinde ótken baspasóz máslıhatynda QR Ulttyq banki Aqmola fılıaly dırektory Vıtalıı Cheýsov aıtty, dep habarlaıdy QazAqparat tilshisi.

Brıfıngte bank ókili aldymen, qarjy naryǵyndaǵy qazirgi jaǵdaı jáne elimizdiń búgingi qarjy-ekonomıkalyq saıasaty jaıynda pikirimen bólisti. Onyń aıtýynsha, 2017 jyldyń qorytyndysy boıynsha Aqmola oblysynyń bank júıesinde Kókshetaý qalasynda jáne oblysta ekinshi deńgeıli bankterdiń 19 fılıaly jáne «Qazposhta» aktsıonerlik qoǵamynyń Astana fılıaly «Astana poshtamty» Kókshetaý qalalyq poshta baılanysy toraby jumys isteıdi.

«2018 jyldyń 1 qańtaryndaǵy jaǵdaı boıynsha bankterdegi depozıtteriniń jalpy kólemi 145,7 mıllıard  teńgeni qurap, ótken jylmen salystyrǵanda 18,8 paıyzǵa jáne 126,6 mıllıard teńgege jetti. Depozıtterdiń jalpy somasyndaǵy jeke tulǵalardyń depozıttik úlesi 86,8 paıyzdy qurady», - dedi Vıtalıı Cheýsov óz sózinde.

Sonymen qatar, ol aǵymdaǵy jyldyń 1 qańtaryndaǵy jaǵdaı boıynsha ekonomıka salasyna salynǵan nesıelik salymdardyń jalpy kólemi 216,5 mıllıard teńgeni quraǵanyn atap ótti. Bul kórsetkish ótken jyldyń sáıkes kezeńimen salystyrǵanda 29 paıyzǵa artyp otyr. Degenmen, osy kúni berilgen nesıelerdiń tolyq qaıtarylmaı jatqan da jaıy bar.

«Qazirgi kezde bankterdiń tutynýshylyq nesıeleri boıynsha oblys halqynyń bereshegi 57 mıllıard teńgege jetti. Ipotekalyq nesıeleri boıynsha oblys halqynyń bereshegi 26,4 mıllıard teńgeni qurady», - dep atap ótti Vıtalıı Cheýsov.

Brıfıngte depozıtter jáne tólem kartochkalar naryǵyndaǵy ahýal, respýblıka boıynsha daryndy jas mamandardy  izdestirý jaıy da sóz boldy. Máselen, aldyńǵy jylmen salystyrǵanda byltyr bankterdegi ulttyq valıýtamen salynǵan depozıtterdiń jalpy kólemi 33,9 paıyzǵa artyp, 89,9 mıllıard teńgeni  quraǵan.