Aqmolalyqtardyń 18 paıyzy koronavırýs vaktsınasyn aldy
Aqmola oblysynda 131 egý pýnkti jáne vaktsınatsııalaýǵa arnalǵan 120 mobıldi brıgada jumys isteıdi.
Budan basqa, 11 jyljymaly medıtsınalyq keshen (Aqkól, Arshaly, Astrahan, Atbasar, Býrabaı, Ereımentaý, Esil, Jarqaıyń, Zerendi, Qorǵaljyn, Tselınograd aýdandary) iske qosyldy.
«Búgingi tańda bizde 809 naýqas emdelip jatyr. Onyń ishinde 427 adam statsıonarlyq emdelýde, 47 aqmolalyq reanımatsııada, onyń tórteýi ókpeni jasandy jeldetý apparatyna qosylǵan», – dep habarlady Aqmola oblysy densaýlyq saqtaý basqarmasynyń basshysy Narıman Syzdyqov.
Spıkerdiń aıtýynsha, ádette, aýyr naýqastar - ilespe aýrýlary bar egde jastaǵy adamdar.
N.Syzdyqov vaktsınanyń adam aǵzasynyń reprodýktıvtik júıesine áseri jónindegi barlyq qaýipti joqqa shyǵaryp, búgingi kúni koronavırýsqa qarsy vaktsınanyń qandaı da bir organdarǵa janama áseri týraly bir de bir shynaıy derek joq ekenin atap ótti.
«Egý naýqany bastalǵannan beri úsh vaktsınanyń birinshi komponentiniń 160 100 dozasy alyndy, 95094 adam egildi, bul - jalpy halyqtyń 18 paıyzy. Úsh vaktsınanyń ekinshi komponentinen 104100 doza alyndy, 59 384 adam egildi (birinshi komponentti alǵandardyń 62 paıyzy), bul oblys halqynyń 11 paıyzy», - dep tolyqtyrdy Aqmola oblysy sanıtarlyq-epıdemıologııalyq baqylaý departamenti basshysynyń mindetin atqarýshy Serik Omarhanov.
Aqmola oblysynda búginde tórt vaktsınamen vaktsınatsııa júrgizilýde, onyń sońǵysy - Corona Vac – jaqynda paıda boldy.
Sonymen, egý naýqany bastalǵannan beri 115600 doza «Spýtnık V» alyndy, birinshi komponent 68409 adamǵa egildi, bul 59 paıyzdy quraıdy.
Aımaqqa otandyq QazVac vaktsınasynyń 2000 dozasy jetkizildi, 1626 (80 paıyz) egildi jáne 30500 xayatvak dozasy, 24975 (82 paıyz) egildi.
Corona Vac vaktsınasynyń 12000 dozasy kelip tústi, 84 adam egildi (0,7 paıyz).
Oblysta egilgender arasynda vaktsınatsııadan keıingi asqynýdyń qandaı da bir jaǵdaılary tirkelgen joq.
Qyzba, ınektsııa ornynda ortasha aýyrsyný jáne álsizdik bolýy múmkin.