Aqmolalyqtardy tolǵandyrǵan máseleler qoǵamdyq keńeste qaraldy
Oblystyq ishki saıasat basqarmasynyń málimetinshe, «Halyq únine qulaq asatyn memleket» tujyrymdamasy aıasynda óńir depýtattary turaqty túrde halyqpen kezdesip turady. Tujyrymdama aıasynda árbir azamat depýtatqa óz máselesi boıynsha júgine alady, al olar óz kezeginde olardyń saýaldaryna jedel ári syndarly jaýap qaıtarady.
Búgin Kókshetaý qalalyq máslıhatynyń hatshysy Rústem Qalıshev bastaǵan oblys ortalyǵynyń depýtattary jeke máselelerin aıtyp kelgen turǵyndardy qabyldap, saýaldaryna qulaq túrdi. Azamattardy qabyldaý barysynda turǵyndar Krasnoıar aýylyndaǵy kárizdi jóndeý, turaqty tirkelý, turǵyn úı kezegi jáne basqa da ózekti máselelerdi kóterdi. Onda aıtylǵan barlyq suraqtar boıynsha túsiniktemeler berilip, olardyń keıbireýleri qalalyq máslıhat basshysynyń jeke baqylaýyna alyndy.
Qabyldaýǵa kelgender arasynda Kókshetaý qalasynyń turǵyny Roza Krylova turǵyn úı alý máselesin kóterdi.
«Kez kelgen adam óziniń jeke baspanasy bolǵanyn qalaıdy. Meniń turaqty tirkeýim bolmaǵandyqtan, turǵyn úıge kezekke turý úshin qıyndyqtar týyndady. Búgin qabyldaýda depýtattar maǵan tirkeýge jáne kezekke turýǵa qalaı kómektesýge bolatynyn túsindirdi», - dedi Roza Krylova.
Al, zeınetker Bıbinur Ǵabdrahmanova bolsa, Vasılkovskıı shaǵyn aýdanynda tikeleı jol salý máselesin qozǵady.
«Mundaı qabyldaý ótkizý halyq úshin óte qajet. Meni jáne kórshilerimdi tolǵandyratyn Vasılkovskıı shaǵyn aýdany jaǵynan jol salý máselesi sheshimin tabatyny qýantty», - dedi zeınetker.
Depýtattardyń aıtýynsha, atalmysh joldy salý úshin qazirgi kezde onyń jobalyq-smetalyq qujattamasy ázirlenýde, joba kelisilgennen keıin qarjy bólinetin bolady.
«Mundaı qabyldaýlar júıeli túrde ótkizilip turady. Bul turǵyndardyń belgili bir máseleler sheship, saýaldaryna tushymdy jaýap alýlaryna múmkindik beredi», - deıdi depýtattar.
Qabyldaýda turǵyndar kótergen saýaldardyń 20-ǵa jýyǵy boıynsha jumystar qolǵa alynsa, bir bóligi tıisti memlekettik organdarǵa jiberiletin bolady.
