Aqmolalyqtardy áleýmettik jeli arqyly qorqytqan er adam ustaldy

KÓKShETAÝ. QazAqparat - Aqmola oblysynda áleýmettik jeli arqyly qorqytý habarlamasyn taratqan kúdikti ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.

Vedomstvonyń deregi boıynsha, polıtsııaǵa óńirdiń birqatar turǵyny habarlasyp, belgisiz er adam olardyń áleýmettik jelidegi akkaýnttary arqyly qorqytqanyn aıtqan. Kúdikti turǵyndardyń ózderine jáne balalaryna qatysty óltirý jáne zorlyq taqyrybynda habarlama joldaǵan. Sonymen qatar, ol mátindik habarlamadan bólek, jaman pıǵyldaǵy sýretter jibergen.

Belgili bolǵandaı, er adamnyń «Odnoklassnıkı» áleýmettik jelidegi paraqshasy jalǵan bolyp shyqty. Ol jeli qoldanýshylardyń ashyq paraqshalaryna kirip, balalardyń sýretterin júktep alǵan. Keıin qorqytý habarlamasyn joldaǵan. Qazirgi kezde, osyndaı 9 oqıǵa tirkelip, onyń árbireýi boıynsha QR QK 115-baby boıynsha sotqa deıingi tergeý amaldary júrgizilýde.

«Jedel-izdestirý sharasy kezinde krımınaldyq polıtsııa qyzmetkerleri Aqmola oblysynyń aýmaǵynda kúdikti retinde jergilikti turǵyndy ustady. Er adamnan áleýmettik jelige jalǵan akkaýntpen tirkelgen uıaly telefon jáne habarlama men fotosýretter tárkilendi», - deıdi vedomstvodan.