Aqmolalyqtar jer qoınaýyn zańsyz paıdalanýshylarmen kúresýde
KÓKShETAÝ. QazAqparat - Aqmola oblysynda jer qoınaýyn zańsyz paıdalanýshylarmen tabandy kúres júrgizilýde, dep habarlaıdy QazAqparat tilshisi ákimdikti baspasóz qyzmetine silteme jasap.
Kóktem-jaz maýsymy kezinde óńirde qum jáne qıyrshyq tas sııaqty qurylys materıaldaryn urlaýmen aınalysatyn jer qoınaýyn zańsyz paıdalanýshylardyń qarasy kóbeıedi.
Jer qoınaýyn zańsyz paıdalanýshylar aýdan, oblys bıýdjetine salyq tóleýden jaltarsa, endi bir jaǵynan qorshaǵan ortaǵa ekologııalyq zardaptar ákelýde.
Aǵymdaǵy jyldyń basynda aımaq basshysy jer qoınaýyn paıdalanýda zańsyzdyqqa jol bermeý úshin 2018 jyly júzege asyrylatyn sharalardyń josparyn bekitken bolatyn.
«Qazirgi kezde, Astana aglomeratsııasy aımaǵynda 111 kenishi jumys isteıdi. Aqmola oblystyq ónerkásip jáne kásipkerlik basqarmasy olardyń kelisimshartta kórsetilgen mindettemelerin oryndaýyna monıtorıng júrgizip otyrady. Byltyrǵy jyly 27 kelisimshart buzyldy, 29 jer qoınaýyn paıdalanýshyǵa kelisimshartaǵy mindettemelerin oryndamaǵany týraly eskertý jasaldy. Bıylǵy jyldyń basynan beri 3 kelisimshart óz kúshin joıdy», dep túsindirdi baspasóz qyzmetindegiler.
Málik Myrzalın ІІD men kólik ınspektsııasynyń basshylyǵyna jáne astanalyq aýdandardyń ákimderine jer qoınaýyn zańsyz paıdalanýshylardyń jolyn kesý jumystaryn shıratýdy tapsyrdy.
Foto: kmv.gorodskoitelegraf.ru
