Aqmolalyqtar Jeńis kúnin sán-saltanatymen atap ótti
Merekelik shara oblys ákimi Ermek Marjyqpaev, oblystyq máslıhat depýtattary, oblys ákiminiń orynbasarlary, soǵys jáne eńbek ardagerleri, oblystyq jáne qalalyq kásiporyn-uıym, mekemelerdiń basshylarynyń qatysýymen Keńes Odaǵynyń Batyry Málik Ǵabdýllınniń eskertkishi jáne Keńes Odaǵynyń eki márte Batyry Talǵat Bıgeldınovtyń bıýstine gúl shoqtaryn qoıý rásimimen bastaldy.
Budan keıin merekelik shara «Abylaı han» alańynda jalǵasyn tapty. Onda osynaý merekeni toılaýǵa shyqqan myńdaǵan aqmolalyq «Uly Jeńiske taǵzym!» ádebı-mýzykalyq kompozıtsııasyn tamashalady.
Saltanatty mıtıngide óńir basshysy Ermek Marjyqpaev quttyqtaý sóz alyp, elimizdi zulym jaýdan qorǵap qalǵan ardagerlerdiń atyna izgi tilegin joldady.
Aımaq basshysy atap ótkendeı, Aqmola oblysynan 90 myń adam maıdanǵa shaqyrylyp, 37 myńnan sál astamy ǵana oraldy. Aqmolalyqtar barlyq maıdandarda soǵysyp, Máskeý, Stalıngrad, Kýrsk doǵasyndaǵy shaıqasqa qatysty. Onyń ishinde 66 aqmolalyq Keńes Odaǵynyń Batyry jáne Dańq ordeniniń tolyq kavalerleri boldy.
Sonymen birge, áskerı kıim kıgen jastar bı bılep, án aıtyp, merekeniń mánin odan saıyn asha tústi.
Alǵashqy «Qazaqstan – baqyt mekeni» kórinisi Úkili Ybyraı atyndaǵy Aqmola oblystyq fılarmonııasynyń solısteri Serikbolsyn Bekmoldın, Aıagóz Qalmaǵanbetova, Abzal Es, Áıgerim Dáýlethan, beıbit aspan men jańa qazaqstandyq patrıotızmdi beıneleıtin «Kókshetaý» mádenıet saraıy shyǵarmashylyq ujymdarynyń oryndaýyndaǵy Serik Ibragımovtyń «Otanym» ánimen ashyldy.
Sh.Qusaıynov atyndaǵy Qazaq mýzykalyq drama teatry akterleriniń oryndaýyndaǵy «Málik Ǵabdýllın» kórinisinde «Jas ǵabdýllınshiler» klýby, «Kókshetaý» mádenıet saraıy horeografııalyq ujymdarynyń qatysýshylarymen «Jeńis lentasy» merekelik lentasyn bir mezette taratý rásimi uıymdastyryldy.
«Bı – rýh tynysy» kórinisinde Aqan Seri atyndaǵy joǵary mádenıet kolledjiniń horeografııalyq ansamblderi, «Kókshetaý» mádenıet saraıynyń «Tumar», «Sývenır» halyqtyq bı ansamblderiniń oryndaýynda soldattyq ánder oryndaldy.
«Uly Jeńis» kórinisi Úkili Ybyraı atyndaǵy Aqmola oblystyq fılarmonııasy, Birjan sal atyndaǵy mýzykalyq kolledji birlesken hory, Abaı Myrzahmetov atyndaǵy Kókshetaý ýnıversıtetiniń «Symbat», «Palıtra» horeografııalyq ansamblderi, «Dostar» mádenıet saraıynyń «Asyl mura», «Araı» bı ansamblderi men horeografııalyq ujymdarynyń oryndaýyndaǵy I.Elemesiniń «Jeńis kúni» ánimen súıemeldendi.
«Atameken» kórinisi de áserli boldy. E.Hasanǵalıevtiń «Atameken» ánin «Kókshetaý» mádenıet saraıynyń trıosy oryndaýynda jáne horeografııalyq ujymdarynyń kishi toptary men jastar resýrstyq ortalyǵy qatysýshylarynyń qala turǵyndaryna bir mezette 500 memlekettik jalaýlardy tabystaýymen aıaqtaldy.
Merekelik shara jergilikti shyǵarmashylyq ujymdarynyń oryndaýyndaǵy «Uly Jeńis ánderi!» keshki merekelik kontserttik baǵdarlamaǵa ulasady.
Aıta ketsek, budan buryn Jeńis kúnine oraı aqmolalyq soǵys ardagerleri 1,5 mln teńgeden alatynyn jazǵan edik.
