Aqmolalyqtar jemqorlyqqa qarsy qyzmetke Facebook arqyly júgine alady
«Qazaqstan Respýblıkasynyń Sybaılas jemqorlyqqa qarsy is-qımyl agenttigi qoǵamdaǵy jemqorlyqqa qarsy mádenıetti qalyptastyrýǵa, turmystyq jemqorlyqty joıýǵa, azamattardyń jemqorlyqqa qarsy ımmýnıtetin kúsheıtýge aıryqsha kóńil bóledi. Agenttik qyzmetiniń negizgi ustanymy ashyqtyq jáne qoljetimdilik bolyp tabylady. Agenttik tóraǵasy Alık Shpekbaevtyń Facebook áleýmettik jelisinde paraqsha ashýy jáne oǵan azamattardan kóptegen ótinishterdiń kelip túsýi osynyń jarqyn mysaly. Bul sharanyń memlekettik apparatqa degen senimniń artýyna, halyqpen shuǵyl ári sapaly baılanysty qamtamasyz etýge yqpal etkeni sózsiz.
QR Sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń jańa taǵaıyndalǵan basshysy Murat Tóleýbaev jergilikti turǵyndardyń suraqtaryna jaýap qatý jáne olardy áldeqaıda tolǵandyratyn máselelerdi sheshý maqsatynda Facebook áleýmettik jelisinde óziniń jeke paraqshasyn ashty», deıdi vedomstvodan.
Paraqsha asha otyryp, Murat Tóleýbaev oblys turǵyndaryna arnap óziniń alǵashqy postyn jarııalady.
«Qazirgi ýaqytta ınternet-resýrstar jańa mánge ıe bolyp, memleket pen azamattar arasyndaǵy baılanystyń mańyzdy quralyna aınalýda. Áleýmettik paraqsha Sizder óz suraqtaryńyz ben máselelerińizdi aıtyp, sybaılas jemqorlyqqa qarsy is-qımyl máseleleri boıynsha óz pikirlerińiz ben usynystaryńyzdy jetkize alatyn tıimdi dıalog alańyna aınalatynyna senimdimin. Osyndaı ózara yntymaqtastyq sybaılas jemqorlyqqa qarsy is-qımyl sheńberinde ashyq, tıimdi ári jedel árekettestiktiń kókjıegin keńeıtýge yqpal etetini sózsiz», - dep jazdy Murat Tóleýbaev.
Departament basshysynyń aıtýynsha, áleýmettik jelilerdegi ótinishter departamenttiń jumysyna qoǵamdyq pikir prızmasy arqyly qarap, naqty kemshilikterdi kórýge múmkindik beredi.