Aqmolalyqtar Volonterler jylyna daıyndyqty bastap ketti
Memleket basshysy Qasym-Jomart Toqaev 2020 jyldy Qazaqstandaǵy Eriktiler jyly dep jarııalaǵan edi. Qazirgi ýaqytta elimizde 200-den astam eriktiler uıymy jumys isteıdi, oǵan 50 myńnan astam belsendi qatysady. Aqmola oblysynda bul kórsetkish - 150 adam.
«Jańa tolqyn» qoǵamdyq qorynyń tóraıymy Jaınagúl Qappasovanyń aıtýynsha, búgingi tańda eriktiliktiń áleýmettik jáne etnoeriktilik túrine suranys joǵary jáne belsendi bolyp tabylady. Aqmola oblysynda áleýmettik, sport jáne mádenıet sııaqty salalaryndaǵy qoǵamdyq máselelerdi sheshýge baǵyttalǵan.
«Aqmolalyq eriktiler elimizde ótken «EKSPO-2017», Ýnıversıada, OBSE Samıti sııaqty kóptegen halyqaralyq sharalarǵa qatysty. Búgingi kúni oblysta eriktiler jumysymen «Aqmola Jańa tolqyn» qoǵamdyq qory «Jas Ulan» balalar men jasóspirimderdiń uıymy, «Jas Otan» jastar qanaty, «Fenıks» eriktiler ortalyǵy aınalysady.
Eriktiler uıymy soǵys ardagerlerine qoldaý kórsetýde, obyr dertine shaldyqqan balalarǵa kómek qolyn sozý maqsatynda qaıyrymdylyq sharalaryn ótkizýde», dep atap ótti Jaınagúl Qappasova.
Al, Aqmola oblystyq ishki saıasat basqarmasynyń jastar isteri boıynsha bólim basshysy Almat Núkenovtyń málimetinshe, 2019 jyly oblystyq ishki saıasat basqarmasy tarapynan «balalar men jasóspirimderdiń jáne eriktilerdiń qozǵalysyn damytý boıynsha lot uıymdastyryldy. Osynyń sheńberinde eriktilikti damytý boıynsha birqatar sharalar júzege asyryldy.
«Bıyl 17 grant usynyldy, onyń ishinde Aqmola oblysy jeke ıdeıa men jobany júzege asyrý baǵytynda sommasy 1 mıllıon teńge bolatyn 1 gran utyp aldy. Sonymen qatar, eriktilikpen aınalysatyn stýdentterdiń aqyly áleýmettik tájirıbeden ótýine múmkindigi bar», – deıdi Almat Núkenov.
Al eriktiler korpýsynyń úılestirýshisi Tatıana Kretova Eriktiler jyly elimizde eriktilik qozǵalys pen bastamanyń damýyna serpin beretinine toqtaldy.
«Prezıdent jarııalaǵan 2020 jyl – Eriktiler jyly eriktilikke qatysty jańa jobalar ashylatynyna úmittemiz. Bul jobalar úkimet tarapynan da qoldaý tabaryna senimdimiz. Eriktiler jylyn jarııalaý eldegi bul qozǵalystyń jańa serpin alaryna, jańa júıelerdiń paıda bolýyna, uıymdardy biriktirýge múmkindik beredi», – dep atap ótti ol.
