Aqmolalyqtar vırýsqa qarsy jáne ystyq túsiretin preparattyń tapshylyǵyna shaǵymdanýda
KÓKShETAÝ. QazAqparat - Aqmola oblysynyń turǵyndary dárihanalarda vırýsqa qarsy jáne ystyq túsiretin preparattardyń joqtyǵyna shaǵymdanýda. Al tabylǵan dáriniń baǵasy birneshe ese qymbatqa satylýda. Búgin óńirde ótken brıfıng barysynda turǵyndar oblys ákimi Ermek Marjyqbaevqa osyndaı shaǵym jasady, dep habarlaıdy QazAqparat tilshisi.
Qazirgi ýaqytta oblysqa dári-dármekti «Amanat» kompanııasy jetkizip otyrǵanyn aıtqan óńir basshysy turǵyndardy preparattardy kóptep satyp almaýǵa shaqyrdy. Sebebi dári-dármek naǵyz muqtaj bolyp otyrǵan adamdarǵa jetpeı qalýy múmkin.
«Antıbıotık jáne ystyq túsiretin dárilerge baılanysty «SK-Farmatsııa» kompanııasymen jumys istep jatyrmyz. Kúni keshe ǵana 2 aptaǵa jetýi tıis preparattar aldyq», - dedi Ermek Marjyqbaev.
Ákimniń atap ótýinshe, 1 tamyzǵa deıin oblysta qosymsha 5 myń statsıonarlyq tósek-oryn ashylatyn bolady.
Sondaı-aq brıfıng barysynda aqmolalyqtar ákimge shaqyrtýǵa uzaq ýaqyt keshigip keletin jáne naýqastardy aýrýhanaǵa alyp ketpeıtin jedel járdem qyzmetine qatysty suraqtaryn qoıdy.
Osy rette oblys basshysy tamyz-qyrkúıek aılarynyń ishinde óńirge jańa 50 jedel járdem kóligi kelýi tıistigin aıtty.
Aıta keterligi, oblysta ókpeni jasandy jeldetýge arnalǵan 268 apparat bar.
