Aqmolalyqtar Túrkistan oblysyna gýmanıtarlyq kómek jiberdi

KÓKShETAÝ. QazAqparat – Aqmola oblysynyń qoǵam ókilderi el bolyp, sý tasqynynan zardap shekken Túrkistan oblysyna gýmanıtarlyq kómek jiberdi, dep habarlaıdy QazAqparat tilshisi oblystyq ishki saıasat basqarmasyna silteme jasap.

Eń birinshi bolyp Atbasar aýdanynyń kásipkerleri qol ushyn sozdy. Aýdandaǵy «Shýıskoe» JShS dırektory Altynbek Qurmanqulovtyń aıtýynsha, birinshi transh boıynsha sý tasqynynan zardap shekkenderge 25 tonna un jiberildi.

«Otandastarymyz qıyn jaǵdaıǵa tap bolǵan kezde qol ushyn sozý bizdiń basty mindetimiz. Qazir biz ekinshi transh boıynsha un jiberýdi josparlap otyrmyz», - dep atap ótti kásipker.

«Kókshetaý qalasynyń júk klýby» avtoáýesqoılar qaýymdastyǵy uıymdastyrǵan azyq-túlik, kıim-keshek sııaqty áleýmettik mańyzdy taýar túrindegi gýmanıtarlyq júk tıelgen avtokerýen Maqtaaral aýdanyna atandy.

Qazaqstan halqy Assambleıasynyń ókilderi, Qazaqstan musylmandary dinı basqarmasynyń oblystyq fılıaly (Naýan haziret meshiti), «Zeket» qory 4 mıllıon teńge kóleminde aqsha aýdardy.

Qajetti kómek jınaý jalǵasyp jatyr. Jalpy, Aqmola oblysynan Maqtaaral aýdanynyń turǵyndaryna 50 tonnadan astam gýmanıtarlyq kómek jiberildi.