Aqmolalyqtar Nur-Sultanǵa 220 tonnadan astam aýyl sharýashylyǵy ónimin jetkizedi
KÓKShETAÝ. QazAqparat - 2019 jylǵy shildeniń 6-7 kúnderi elordada aqmolalyq aýyl sharýashylyǵy taýarlaryn óndirýshilerdiń qatysýymen azyq-túlik jármeńkesi ótedi, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvonyń málimetinshe, qala kúnine oraı «Han Shatyr» saýda, oıyn-saýyq kesheni aldyndaǵy alańda uıymdastyrylatyn jármeńkede 240 mıllıon teńgeniń 220 tonnadan astam azyq-túlik ónimderi saýdaǵa shyǵarylady. Onyń ishinde 100 tonnadan astam et jáne shujyq ónimderi, 290 myń dana jumyrtqa, 26,4 tonna sút jáne sút ónimderi, 3 tonna ósimdik maıy, 18 tonna kókónis jáne ózge de aýyl sharýashylyq ónimderi jetkiziledi dep josparlanǵan.
«Jármeńkede qala turǵyndary men qonaqtary 30-dan astam azyq-túlik túrin bazar naryǵynan 10-20 paıyz tómen baǵada satyp ala alady. Otandyq taýarlardy 2 qala men 17 aýdannan 50 kásiporyn usynady. Sondaı-aq, jármeńkege kelýshiler úshin Aqmola oblysynyń shyǵarmashylyq ujymdary merekelik baǵdarlama uıymdastyrady», - deıdi vedomstvodan.
