Aqmolalyqtar Nur-Sultanǵa 14 myń tonna et jáne et ónimderin jetkizgen
Aqmola oblystyq aýyl sharýashylyǵy basqarmasynyń basshysy Dımash Talasbaevtyń aıtýynsha, elorda turǵyndaryna aqmolalyq taýar óndirýshilerdiń ónimin tikeleı jetkizý boıynsha «AQMOL» fırmalyq dúkender jelisi jumys isteıdi.
«Osy kúni elordaǵa jetkizilip jatqan taýardyń kóbi osy «AQMOL» dúkender jelisi men 44 saýda ornynda satylýda. Kún saıyn oblystyń kásiporyndary 80 tonna et pen et ónimderin, 200 tonna sút ónimderin, 700 myń dana jumyrtqa jáne 25 tonna un jetkizedi», - deıdi Dımash Talasbaev.
Jalpy, 2019 jyly munda jalpy quny 495 mıllıon teńge bolatyn 290 tonnadan astam azyq-túlik ónimi satyldy. Osynyń nátıjesinde elorda turǵyndary naryq baǵasynan 15-20 paıyzǵa arzan azyq-túlikti satyp alý múmkindigine ıe bolyp otyr.
«Úkimet bekitken elordanyń aınalasynda azyq-túlik beldeýin qalyptastyrý boıynsha Jol kartasy sheńberinde 2021 jylǵa deıin 4 900 basqa arnalǵan 4 taýarly sút fermasyn ashý josparlanǵan. Sondaı-aq, tamshylatyp sýarý jerleriniń kólemin 18 myń gektarǵa jetkizý máselesi de nazarda. Elordaǵa jetkizilgen azyq-túlik ónimderi «Metro», «Astyqjan», «Magným», «Ramstor» jáne «Eýrazııa», «Álem», «Shapaǵat» tárizdi 44 iri saýda oryndarynda satylady.
Ústimizdegi jyldyń alty aıynda 14 myń tonna et jáne et ónimderi jetkizildi. Oblystaǵy et óndirýshi iri kásiporyn «KazBeef» kompanııasy Metr jelisimen et jetkizip berip turý boıynsha uzaq ýaqytqa kelisim-shartqa turdy. Osynyń aıasynda jyl saıyn premıým klasty 5 myń tonna sıyr etin jetikip turady. Oblysta birinshi kezekte Makınsk qus fabrıkasy iske qosyldy. Ótken jyly kásiporynda 25 tonna sýytylǵan taýyq eti óndirildi. Kásiporynnyń basty tutynýshysy Nur-Sultan qalasy. Kásiporyn keleshekte óndiris qýatyn 100 myń tonnaǵa deıin jetkizýdi kózdep otyr», - dep tolyqtyrdy Dımash Talasbaev.
Aıta keteıik, basqarma basshysynyń bizge bergen derekterine súıensek, Aqmola oblysy elordanyń sútke degen suranysynyń 34 paıyzyn jabady. Bıylǵy alty aıda astanaǵa 64 myń tonna sút ónimderi jetkizildi. Onyń ishinde «Rodına agrofırmasy», «MılkProdjekt» seriktestikteri jáne «Astana ónim» aktsıonerlik qoǵamy kún saıyn 100 tonnaǵa deıin sút ónimderin tasymaldaıdy. Óńirde un tartý jáne jumyrtqa shyǵarý ónerkásibi durys jolǵa qoıylǵan. Sondyqtan, oblys elorda turǵyndarynyń un men jumyrtqaǵa degen suranys tolyq jaba alady. Jyl basynan beri «Qazger qus», «Ijevskıı» óndiristik kooperatıvi» «Úsh bulaq», «Agroınvest 2015» tárizdi seriktester 137 mıllon dana jumyrtqa jetkizip, astanalyqtardyń jumyrtqaǵa degen suranysynyń 94 paıyzyn japty.
Budan bólek, ótken jyly aqmolalyq aýyl sharýashylyǵy taýarlaryn óndirýshiler 102 myń tonnadan astam kartop (suranystyń 92 paıyzy), 30,3 myń tonnadan astam kókónis (suranystyń 30 paıyzy) jetkizdi.
Jalpy, Aqmola oblysynyń aýyl sharýashylyǵy týaralaryn óndirýshiler bıylǵy jyldyń qorytyndysy boıynsha elordaǵa barlyǵy 100 myń tonnadan astam kartop, 30 tonnadan astam kókónis jetkizýdi josparlap otyr.
