Aqmolalyqtar Nur-Sultandy 500 myń tonnadan astam ónimmen qamtamasyz etpek
KÓKShETAÝ. QazAqparat - Aqmola oblysynda elordanyń aınalasynda azyq-túlik beldeýin damytý boıynsha baǵdarlama júzege asyrylýda, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvonyń málimeti boıynsha, mundaǵy basty maqsat kúnnen kúnge suranys artyp kele jatqan elorda halqynyń otandyq azyq-túlik ónimderine degen suranysyn qanaǵattandyrý. Aqmola oblysynyń aýyl sharýashylyǵy basqarmasynyń deregine súıensek, sońǵy 10 jylda oblysta 127,4 mıllıard teńgege 138 joba júzege asyryldy. Onyń ishinde 35 joba mal sharýashylyǵyn damytýǵa, 18 joba aýyl sharýashylyǵy ónimderin qaıta óńdeýge, 85 joba astyq daqyldary men kókónisterdi saqtap, óńdeýge arnalǵan.
Qolǵa alynǵan sharalardyń nátıjesinde óndiris kólemi artyp, Nur-Sultanǵa jetkiziletin aýyl sharýashylyǵy ónimderiniń kólemi ulǵaıdy.
Ótken jyldyń ózinde elordaǵa 28 myń tonna et jáne et ónimderi, 112 tonna sút jáne sút ónimderi, sondaı-aq, jumyrtqa, kartop jáne kókónis jetkizildi.
Búgingi tańda Aqmola oblysyndaǵy 128 kásiporyn Nur-Sultan qalasyna azyq-túlik ónimderin jetkizip keledi jáne ony satýda saýda oryndary ashylýda. Aqmolalyq aýyl sharýashylyǵy taýarlaryn óndirýshiler ónimderin saýdalaıtyn 44 saýda ornynan bólek «AQMOL» saýda jelisiniń 5 fırmalyq dúkeni jumys isteıdi. 2020 jylǵa deıin bul dúkenderdiń sanyn 10 jetkizý josparlanǵan.
Nur-Sultan aınalasynda azyq-túlik beldeýin qalyptastyrý óńirde jańa sút qabyldaý oryndary men mal bordaqylaý alańdarynyń ashylýyna, et jáne sút ónimderin shyǵaratyn kásiporyndardyń tolyq qýatyna shyǵýyna yqpal etti. Aldaǵy ýaqytta taǵy 5 taýarly-sút fermasyn qurý josparda bar.
«Qolǵa alynǵan bul sharalardyń barlyǵy Nur-Sultan qalasyna negizgi azyq-túlik ónimderin jetkizý kólemin arttyrýǵa múmkindik beredi. Máselen, bıylǵy jyly astana naryǵyn 551,1 myń tonna aýyl sharýashylyǵy ónimderin jetkizý josparlanǵan bolsa, 113 myń tonnasy sút, 102,1 myń tonnasy kartop jáne taǵy basqa ónimderi», dep atap ótti Aqmola oblysynyń aýyl sharýashylyǵy basqarmasyndaǵylar.
