Aqmolalyqtar Naýryz meıramynda «Uly Dala - mekenim» qoıylymyn tamashalady
Arqa jurtynyń osynaý meıramdy asyǵa kútkeni sonshalyq, Abylaı han jáne Táýelsizdik alańdarynda ıne shanshar jer bolmady. Eńbektegen baladan eńkeıge qarııaǵa deıin ortalyq alańǵa aǵyldy. Osynaý izgi meıramǵa oraı, Abylaı han alańy merekelik sánmen bezendirilip, dombyranyń kúmbirlegen daýysy qulaq quryshyn qandyrdy. Alańǵa jergilikti kásiporyndar men mekemelerdiń, joǵary oqý oryndarynyń aq shańqan onnan astam kıiz úıleri tigildi. Bul kúni alańǵa merekeni tamashalaýǵa kelgen kókshetaýlyqtar men meımandarǵa tabıǵattyń túrlenýin aıshyqtaý maqsatynda Naýryz kóje, baýyrsaq tárizdi ulttyq taǵamdar usynylyp, 500 keli alma, qyzǵaldaqtar, 1000 dana gúl men 500 shar tegin úlestirildi.
Saltanatty sharaǵa qatysqan Aqmola oblysynyń ákimi Ermek Marjyqpaev quttyqtaý sóz sóılep, jınalǵan halyqqa júrekjardy tilegin arnady. Sondaı-aq, aımaq basshysy óziniń sózinde oblystyq máslıhat jáne oblystyq ákimdiktiń sheshimimen Kókshetaýdaǵy Gorkıı kóshesi Nursultan Nazarbaev dańǵyly bolyp ózgeretinin atap ótti.
«Bul kúnderi elimizdiń ortalyq kóshelerine Nursultan Nazarbaevtyń esimi berilýde. Bul elimizdiń Tuńǵysh Prezıdentiniń memlekettiń tarıhı, ekonomıkalyq jáne áleýmettik-gýmanıtarlyq damýyna, Qazaqstannyń halyqaralyq bedeliniń jáne qazaqstandyq qoǵamnyń nyǵaıýyna qosqan eńbeginiń baǵasy», - dedi ákim.
Merekelik shara «Tabıǵattyń oıanýy», «Batamen - el kógerer», «Syılyq jasaý», «Ata saltymen - asyl qazynam», «Jerdiń kórki - qyzǵaldaq», «Alma merekesi», «Naýryz - dýman» tárizdi shaǵyn qoıylymdarmen jalǵasyn taýyp, merekeniń kórkin odan saıyn asha tústi. Sondaı-aq, Elbasynyń «Uly Dalanyń jeti qyry» maqalasynda aıtylǵan «Atqa mingizý» dástúri kórsetildi.
Oblys ákimi Ermek Marjyqpaev jas búldirshin Mustafany atqa otyrǵyzý rásimine qatysty.
Sharada oblystyq fılarmonııanyń ánshileri men oblystyń ár shalǵaıynan kelgen kórkemónerpazdar ujymdary merekeni ásem ánmen árlendirip, kúmis kúımen, myń buralǵan bımen túrlendirip, kópshilik kóńilinen shyqty.
