Aqmolalyqtar Naýryz meıramyn sən-saltanatpen atap ótýde
Bul joly Arqanyń aq tańymen ilesken aqmolalyqtar Kókshetaýdaǵy Táýelsizdik alańyna jınalyp, Naýryz meıramyn merekelik «Naýryz sán - saltanat, ulttyq rýh» atty teatrlandyrylǵan qoıylymmen qarsy alýda. Bul kúni alańǵa 10-ǵa jýyq kıiz úı tigilip, merekeni tamashalaýǵa kelgen kókshetaýlyqtar men meımandarǵa Naýryz kóje, baýyrsaq tárizdi ulttyq taǵamdar usynylyp, tegin úlestirildi. 
Saltanatty sharaǵa qatysqan óńir basshysy Məlik Myrzalın quttyqtaý sóz sóılep, jınalǵan halyqqa júrekjardy tilegin arnady.
«Naýryz - bul kóktemgi jańarýdyń, aq peıil men tatýlyqtyń merekesi. Ol - ótkendi saralap, bolashaǵymyzdy boljaıtyn erekshe kezeń. Memleket basshysy Nursultan Nazarbaevtyń maqsatty ári sarabdal saıasatynyń arqasynda búginde Qazaqstan kúlli álemge beıbitshiliksúıgish ári bolashaǵy kemel el retinde tanymal bolýda.
Naýryz meıramy ulty men dinı senimine qaramastan Qazaqstanda ómir súrip jatqan barsha halyq úshin berik dostyqtyń, birliktiń nyshanyna aınaldy. Elbasymyz da únemi «bizdiń qoǵamnyń basty baılyǵy - birlik pen yntymaq. Osy qundylyqtardyń arqasynda biz ekonomıkamyzdy kóterdik, azamattardyń dáýletin arttyrdyq, el bolashaǵyn aıqyndadyq», - dep keledi. Qazaqstannyń birligi nyǵaıa tússin! Kóktemmen birge keletin Naýryz rýhanı jańarýǵa jetelep, beıbit pen kelisimdi ári qaraı nyǵaıtýǵa septigin tıgizsin», - dedi óńir basshysy óz sózinde. 
Merekelik shara «Tusaý kesý», «Betashar» tárizdi shaǵyn qoıylymdarmen jalǵasyn taýyp, merekeniń kórkin odan saıyn qyzdyra tústi. Sondaı-aq, «EKSPO-2017» kórmesine arnalǵan robot-transformerlerdiń jəne sońǵy jyldary dástúrge aınalǵan «Dombyra Party», «Qymyz festıvali», «Baýyrsaq Party» shoýyn tamashalady. 
Ásirese, oblystyq fılarmonııanyń ánshileri men oblystyń ár shalǵaıynan kelgen kórkemónerpazdar ujymdary merekeni ásem ánmen árlendirip, kúmis kúımen, myń buralǵan bımen túrlendirip, kópshilik kóńilin shalqyta tústi.
