«Aqmolalyqtar - maıdan men tyl shebinde» atty muraǵattyq qujattar jınaǵy jaryqqa shyqty

ASTANA. Mamyrdyń 4-i. QazAqparat /Marlan Jıembaı/ - Astana qalalyq muraǵattar men qujattamalar basqarmasy men Memlekettik muraǵat ujymdary birigip «Aqmolalyqtar - maıdan men tyl shebinde» atty muraǵattyq qujattar jınaǵyn jaryqqa shyǵardy.

Atalǵan jınaqqa sol kezdegi Aqmola qalasynda jasaqtalǵan 310, 387 jáne 29-shy atqyshtar dıvızııalaryna qatysty buryn jarııalanbaǵan, «qupııalyq» belgisi alynbaǵan qujattar toptastyrylǵan. Kitapqa engen materıaldardan soǵys jyldarynyń qarbalasy men qazaqstandyq tyl eńbekkerleriniń jeńisti jaqyndata túsýge qosqan úlesi, eń bastysy Aqmola qalasynyń sol kezeńdegi tynys-tirshiligi aıqyn kórinedi. Uly Otan soǵysy jyldaryndaǵy áskerı jáne qorǵanys sharalarymen birge áleýmettik jáne saıası salada atqarylǵan qarbalas sátter de kórinis tapqan. Jergilikti bılik organdarynyń Aqmolaǵa ýaqytsha qonys aýdarǵan kásiporyndar men turǵylyqty jerlerinen eriksiz kóshirilgen ult ókilderin ornalastyrý men olarǵa jaǵdaı jasaý barysynda atqarylǵan jumystary da naqty qujattar negizinde áserli baıandalǵan. Q.Toqabaev, Sh.Muqanov, Q.Qamyshuly sııaqty aqmolalyq maıdangerlerdiń jeke qorlarynan alynǵan qujattardy osy jınaqtan tabýǵa bolady. Sonymen qatar «Memorıaldyq aımaq» izdestirý otrıadynyń atqarǵan qyzmeti tolyǵymen ashyp kórsetilgen. Olardyń aralasýymen júzege asyrylǵan jumystardyń jaı-kúıi de jan-jaqty qamtylǵan.

Aqmolalyqtardyń Uly Jeńiske qosqan rólin ashýǵa degen talpynyspen shyǵyp otyrǵan kitap qalyń oqyrman qaýymǵa, eń bastysy Otan úshin ot keshken ardagerlerge, qala tarıhyn zertteýshilerge arnalǵan.

Taralymy - 250 dana.