Aqmolalyqtar kóktemgi egiske daıyndalyp jatyr
KÓKShETAÝ. QazAqparat - Aqmolalyqtar bıyl 5,2 mıllıon gektardan astam alqapqa dán sebýdi josparlap otyr, dep habarlaıdy QazAqparat tilshisi.
Oblystyq aýyl sharýashylyǵy basqarmasy basshysynyń mindetin atqarýshy Dımash Talaspaevtyń aıtýynsha, ótken jyldyń qorytyndysy boıynsha aýyl sharýashylyǵy salasynda óndirilgen ónimniń jalpy kólemi 383 mıllıard teńgeni qurady. Onyń 258 mıllıard teńgesi eginshilikke tıesili. Jer balansyna sáıkes, aýyl sharýashylyǵyna baǵyttalǵan jalpy jer kólemi 5,7 mıllıon gektardy quraıdy, onyń 745,2 myń gektary óńdeletin jer.
«Bıyl 5,2 mıllıon gektardan astam alqapta kóktemgi egis jumystaryn júrgizý josparlanǵan. Onyń 4,3 mln gektaryna dándi jáne burshaqty daqyldar sińiriledi. Bul ótken jylmen salystyrǵanda, birshama artyq. Kóktemgi egis naýqanyn on segiz jumys kúniniń ishinde aıaqtaýdy josparlap otyrmyz. Ol úshin qarqyndy jumys isteý kerek. Qolda bar mal tabyndary úshin birjyldyq jáne kópjyldyq ekpe shóp, júgeri daqylyn 632598 jáne 11416 gektar jerge, sondaı-aq, 258366 gektar alqapqa maıly daqyldar sińiremiz», - deıdi D.Talasbaev.
Sonymen qatar, ol bıylǵy jylǵa 65 myń tonna dızel otynyna kvota bólingenin de atap ótti. Naýryz aıynyń kvotasy boıynsha bólingen 30 myń tonna janar-jaǵar maı tolyq tasymaldanyp alyndy. Qazir janar-jaǵar maı odan ári keste boıynsha tasymaldanýda. Onyń lıtri 150 teńgeni quraıdy. Munymen qatar, oblystyń aýyl sharýashylyǵy taýarlaryn óndirýshileri ýaqytynda ylǵal jabýǵa jáne egis aldynda jer óńdeýge jetkilikti dızel otyny qoryn jasaıdy. Memlekettik tehnıkalyq baqylaýdyń qorytyndysy boıynsha mashına-traktor parkiniń daıyndyǵy 82-100 paıyz qamtamasyz etilgen. Kóktemgi egis naýqanyna ártúrli 16,5 myń aýyl sharýashylyǵy tehnıkasyn paıdalaný josparlanǵan. Onyń 1201-i sheteldik egis kesheni.
«Oblys boıynsha sońǵy úsh jylda 1778 ónimdiligi joǵary aýyl sharýashylyǵy tehnıkasy satyp alyndy. Tehnıkany jańartý bıyl da jalǵasatyn bolady», - dedi basqarma basshysy.
Foto: bambinostory.com
