Aqmolalyqtar Qazaqstan halqynyń birlik kúnin keń kólemde atap ótti

KÓKShETAÝ. QazAqparat - Aqmola oblysynda Qazaqstan halqynyń birligi kúnine arnalǵan merekelik is-sharalar estafetasy jalǵasyp jatyr, dep habarlaıdy QazAqparat tilshisi.

Oblys ortalyǵynyń bas alańynda turǵyndar nazaryna úzdik shyǵarmashylyq ujymdardyń qatysýymen «Jasa, gúldengen Qazaqstan» merekelik baǵdarlamasy usynyldy jáne «Sheberler qalasy» sándik-qoldanbaly óner sheberleriniń kórmesi uıymdastyryldy.

Sharaǵa jınalǵandardy quttyqtaǵan aımaq basshysy Ermek Marjyqpaev eldiń damýyna halyqtyń birligi, dostyǵy men kelisimi arqasynda qol jetkenin atap ótti.

«1 mamyr merekesi – búkil qazaqstandyqtar úshin aıtýly mereke. Táýelsizdiktiń 30 jyly ishinde elimizde dostyq pen yntymaqtastyq, ózara qurmet pen senim qundylyqtary qalyptasty. Biz bul merekeni jańa saıası reformalardy júzege asyrý jaǵdaıynda atap ótip otyrmyz. Sizder men bizdiń mindetimizdiń biri - osy qundylyqtardy saqtaý, arttyrý jáne keler urpaqqa jetkizý. Sonda ǵana biz jańa Qazaqstandy qura alamyz», - dedi aımaq basshysy.

Merekelik shara barysynda elimizdiń damýyna úles qosqan birqatar aqmolalyqtar Alǵys hatpen marapattaldy.

Olardyń arasynda óńirde qazaq tiliniń damýyna atsalysyp júrgen ózge ult ókilderi de bar.

«Birinshi mamyr - ejelden kele jatqan ózara qurmet pen senimniń qundylyqtaryn beıneleıtin eń meıirimdi jáne jarqyn merekelerdiń biri. Men úshin bul mereke júregimde erekshe oryn alady», - deıdi Sáken Júnisova atyndaǵy Kókshetaý qalalyq №18 mektep-lıtseıiniń qazaq tili muǵalimi Karına Root.

Aıta ketsek, merekelik shara oblystyń barlyq qalasy men aýdan ortalyqtarynda uıymdastyrylǵan.

Búgingi tańda oblys aýmaǵynda barlyǵy 100-ge jýyq etnos ókilderi turyp jatyr.