Aqmolalyqtar eki aıaǵynan aıyrylǵan ekskavatorshy úshin 41 lıtr qan tapsyrǵan
KÓKShETAÝ. QazAqparat - Aqmolalyqtar bir kúnniń ishinde eki aıaǵynan aıyrylǵan 25 jastaǵy ekskavatorshy Madııar Tóleýbekov úshin 41 lıtr qan tapsyrǵan, dep habarlaıdy QazAqparat tilshisi.
Aqmola oblystyq qan ortalyǵy málim etkendeı, búgin zardap shegýshi Madııar Tóleýbekov úshin 113 adam qan tapsyrǵan. Olardyń ishinde 20 adam qajetti kórsetkishke saı kelmegen (dıeta ustamaǵan, gemoglobıni tómen). Eger árbir donordan 450 ml qan alynsa, zardap shegýshi jigitke 41 lıtrǵa jýyq qan tapsyrylǵan.
«Qandy «Altyntaý Kókshetaý» AQ-nyń júz qyzmetkeri, sondaı-aq Aqmola oblystyq ІІD, bankter, aýrýhanalar, ákimdikter, sport mektepteriniń ókilderi, saýda úıleriniń qyzmetkerleri, sondaı-aq jumyssyzdar da tapsyrǵan», - dedi oblystyq qan ortalyǵynda.
Budan bólek, Zerendi aýdanynda jergilikti ákimdiktiń bastamasy boıynsha oblystyq qan ortalyǵy jyljymaly pýnktiniń jumysy uıymdastyryldy. Alǵashqylardyń biri bolyp aýdan basshysy Mereke Mustafın qan tapsyrdy.
Qan ortalyǵy Madııar úshin qan tapsyrýdyń osy aptanyń aıaǵyna deıin jalǵasatynyn málim etti.
Eske salaıyq, 21 shilde kúni tańǵy saǵat 08:00-der shamasynda «Altyntaý-Kókshetaý» JShS ashyq kenishinde taý jynysyn qoparyp jatqan ekskavatordyń ústine tastardyń úıindisi qulaǵan bolatyn.
Tas aýyr tehnıkanyń júrgizýshisi otyrǵan kabınasyn basyp qalady. Sóıtip, tas qursaýynda qalǵan 1993 jylǵy júrgizýshi 11 saǵatqa jalǵasqan qutqarý jumystarynan soń ǵana bosatyldy. Keıin jedel járdem qyzmeti onyń Aqmola oblystyq aýrýhanasyna alyp ketedi. Ol uzaq ýaqyt tas úıindisiniń astynda jatqan. Aıaǵy ezilgendikten birden ota jasalyp, dárigerler onyń aıaǵyn kesýge májbúr boldy.
