Aqmolalyqtar «Birge taza Qazaqstan» aktsııasyna atsalysty
KÓKShETAÝ. QazAqparat - Aqmola oblysynda qorshaǵan ortanyń tazalyǵyn saqtaýǵa jáne ekologııalyq mádenıetti tárbıeleýge baǵyttalǵan aktsııa ótýde, dep habarlaıdy QazAqparat oblystyq ishki saıasat basqarmasyna silteme jasap.
Ótken aptada bastalǵan respýblıkalyq estafetany búgin óńirdiń 25 myńnan astam turǵyny jalǵastyrdy. Jalpyulttyq qozǵalysqa túrli qoǵamdyq birlestikterdiń ókilderi, belsendiler, jastar, shaǵyn jáne orta bıznes, qala uıymdary men kásiporyndarynyń ókilderi jáne turǵyndar qatysty.
Ekologııalyq desant erekshe nazar aýdaratyn aımaqty - Buqpa shoqysy, avtokólik joldarynyń boıyn, qalalyq saıabaqtar men skverler aýmaǵyn, sondaı-aq qalalyq qoqys úıindileriniń, kóshelerdiń, aýdan ortalyqtarynyń, Kókshetaý jáne Stepnogorsk qalalarynyń aýmaqtaryn tazartty.
Sonymen birge, Sandyqtaý, Býrabaı, Bulandy aýdandarynyń jaqyn mańdaǵy orman alqaptarynyń aýmaǵy qoqystan tazartyldy, aǵashtar men bordıýrler aqtaldy. Budan bólek, abattandyrý jáne kógaldandyrý aılyǵy aıasynda aqmolalyqtar úsh myńǵa jýyq aǵash kóshetin otyrǵyzdy.
Aktsııaǵa óńir ákimi Ermek Marjyqpaev ta qatysty. Aktsııa barysynda oblys ortalyǵyndaǵy Tsentralnyı shaǵyn aýdany 34 mekenjaıy boıynsha ornalasqan turǵyn úıdiń turǵyndary belsendilik tanytty.
Atalmysh úıdiń turǵyny Kúlshat Darbaevanyń ekologııalyq aktsııa jas urpaqty tárbıeleýdiń tıimdi tásili ekenin atap ótti.
«Nemerelerimiz ben balalarymyz bizdi kórip, olar da senbilikke belsendi qatysty. Óz úıimizdi, kóshemizdi tazalaı otyryp, biz ekologııany saqtaýǵa óz úlesimizdi qosamyz», - deıdi qala turǵyny.
Aktsııaǵa qatysýshylardyń árqaısysy sanıtarlyq tártipti qalpyna keltirý jáne saqtaý úshin óz úlesin qosty. Barlyǵy eki myń tonnadan astam kúl-qoqys jınalyp shyǵaryldy, buǵan óńir boıynsha barlyǵy 370 tehnıka jumyldyryldy.
