Aqmolalyq jýrnalıster Joldaý mindetterin talqylady
Zerendi aýdanyndaǵy Birlestik aýylynda bolǵan «Arqa ajary» gazetiniń bir top qyzmetkerleri Elbasynyń Qazaqstan halqyna arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýy jaıly aýyl turǵyndarymen pikir almasty.
Aýyl mektebinde ótken kezdesýde «Aqmola-«Tirshilik» jaýapkershiligi shekteýli seriktestiginiń dırektory, jazýshy-dramatýrg, Qazaqstannyń eńbek sińirgen qaıratkeri Jabal Erǵalıev «Arqa ajary» gazeti - jergilikti jerdiń tynys-tirshiligin, jaqsy ózgerister men jaǵymdy jańalyqtardy jalpaq jurtqa úzbeı jarııalap kele jatqanyn atap ótti. Sonymen qatar, ol Elbasy Joldaýy ǵasyrdan astam tarıhy bar basylymnyń halyqpen baılanysyn odan ári nyǵaıta túsetinine toqtaldy.
«Biz búgin ımany uıyǵan, bereke daryǵan Birlestik aýylyna kelip, eń áýeli ózderińizben Qazaqstan Respýblıkasynyń Prezıdenti Nursultan Nazarbaevtyń halqymyzǵa arnaǵan jýyrdaǵy Joldaýy jaıly aıtyp, oı bólisýdi maqsat ettik.
Jyl qujaty búgingi áńgimeniń basty arqaýy bolýǵa tıisti dep oıladyq. Prezıdentimizdiń 1997 jylǵy alǵashqy Joldaýynan bastap kúni keshegi Joldaýy aralyǵyndaǵy strategııalyq mindetterdiń birde-biriniń mańyzdylyǵy áli kúnge deıin joıylmaǵandyǵyn ańdar edik. Basty maqsat - el bolý, Qazaqstandy álemniń damyǵan ozyq 30 memleketteriniń qataryna qosý, bul - Máńgilik el bolýdyń muraty!», - dedi Jabal Erǵalıev.
Sonymen qatar, gazettiń sholýshysy, Qazaqstannyń qurmetti jýrnalısi Baqbergen Amalbekov te óziniń oıyn bildirdi.
«Joldaýda týyndaıtyn mindetterdiń barlyǵy eldiń ekpindi damýyn, halqymyzdyń tabysy artyp, alańsyz tirshilik keshýin kózdeıdi. Búgingi emen-jarqyn áńgime aqparat tynysynyń keńdigin baıqatady. Endigi jerde aqparat aıdyny budan da keńı túsetinin, bul kúndelikti qajettilikke aınalatynyn baıqatady. Ýaqyt suranysy da osy. Birlestik mektebiniń aty óńirge jaqsy málim. Munda talaı-talaı aıtýly azamattar tárbıelengen. «Týǵan jerge týyńdy tik» deıtin qaǵıdanyń jaqsy úlgisi aqshańqan aýylda kórinip tur», - dep sózin sabaqtady ardager jýrnalıst.
Elbasynyń Joldaýy mektep muǵalimderin zor qýanysh pen senimge bóledi.
«Joldaýda muǵalimniń qoǵamdaǵy rólin anyqtap, bedelin arttyrý týraly Elbasy aıtqan pikirge shynaıy rızashylyǵymyzdy bildiremiz. «Muǵalim statýsy» týraly zań qabyldanar bolsa, bul ár muǵalimniń jaýapkershiligin de kóteretin bolady», dedi Birlestik orta mektebiniń dırektory Lalagúl Esmaǵulova.
Ashyq pikir almasý jaǵdaıynda ótken kezdesýde aýyl ómirine kókeıkesti máseleler de keńinen qaýzaldy. Birlestik aýylynyń búgingi beınesi kóńil ósiredi. Aqshańqan úıler qatary kóbeıip, joldaryna asfalt tóselipti. Demek, jumyssyzdyq azaıyp keledi. Sharýa qojalyqtary agroóndiris salasyn alǵa jyljytqanyn kóresin.
«Elbasy Nursultan Nazarbaevtyń qazaqstandyqtarǵa arnaǵan bıylǵy Joldaýynda alǵan qoıylǵan mindetterdi júzege asyrýda birligi jarasqan birlestiktikter bir adamdaı atsalysatyndyǵyna senimdimin. Bul Joldaýda aýyl sharýashylyǵy óndirisindegi eńbek ónimdiligin arttyrýǵa aıryqsha kóńil bólinip otyr. Týǵan jerdi kórkeıtý maqsatynda «Aýyl - el besigi» jobasy da iske qosylǵaly otyr. Qazaq tilinde shyǵatyn «Arqa ajary» oblystyq basylymdy aýyl turǵyndary jyl saıyn jazdyrtyp alady. Sondyqtan, oblys ómiriniń aınasy, el ishindegi jylt etken jańalyqtardy ýaqytyly oqyrmandarǵa qulaǵdar etetin basylymmen birlesip, Elbasy Joldaýyndaǵy mindetterdi bir adamdaı atsalysyp júzege asyratyn bolamyz», - dedi kezdesýdi qorytyndylaǵan Seıfýllın aýyldyq okrýginiń ákimi Aqylbek Bekmaǵambetov.
