Aqmolalyq jetkinshek erekshe kútimdegi balalarǵa arnalǵan respýblıkalyq festıvalde «kúmis» aldy
KÓKShETAÝ. QazAqparat – Aqmola oblysy Jaqsy aýdany Zaporoje aýylynyń turǵyny – 15 jastaǵy Medet Serikpaev erekshe bilim berý qajettilikteri bar balalarǵa arnalǵan «Shekarasyz ómir» respýblıkalyq festıvaliniń kúmis júldegeri atandy, dep habarlaıdy QazAqparat Aqmola oblysy bilim basqarmasynyń baspasóz qyzmetine silteme jasap.
QR Bilim jáne ǵylym mınıstrliginiń «Daryn» respýblıkalyq ǵylymı-praktıkalyq ortalyǵy erekshe bilim berilýine qajettiligi bar balalarǵa arnalǵan «Shekarasyz ómir»respýblıkalyq festıvalin qorytyndylady. Oǵan respýblıkanyń barlyq óńirinen 101 qatysýshy, sondaı-aq tórt toptyq ujym ótinish bildirgen bolatyn.
Balalar kelesi nomınatsııalar boıynsha jarysty: vokaldyq oryndaý – jeke án aıtý, vokaldyq ujym, ymmen án aıtý; bı oryndaý, onyń ishinde arbamen bıleý; kórkem shyǵarmashylyq – keskindeme, portret, grafıka, fotoóner, sándik-qoldanbaly shyǵarmashylyq; tehnıkalyq ónertabystar jáne kompıýterlik ázirlemeler, robototehnıka.
Respýblıkalyq baıqaýdyń qorytyndysy boıynsha «Kompıýterlik ázirlemeler, robototehnıka» nomınatsııasy boıynsha Jaqsy aýdanynyń Zaporoje aýylynan kelgen 15 jastaǵy Medet Serikpaev ekinshi orynǵa ıe boldy.
«Nemeremiz Medettiń respýblıkalyq deńgeıdegi baıqaýdyń kúmis júldegeri atanǵanyna óte qýanyshtymyz. Uıymdastyrýshylar men Medettiń muǵalimderine alǵys bildiremin. Sońǵy ýaqytta memleket erekshe bilim berý qajettilikteri bar balalarǵa basa nazar aýdarýda. Biz nátıjesin kórip jatyrmyz. Balalarymyzdyń damýy kerek», – deıdi balanyń ájesi.
«Medet oǵan planshet satyp ápergennen bastap kompıýterlik tehnologııalarǵa qyzyǵýshylyq tanytty. Sondaı-aq Jaqsy aýdanynyń bilim bólimi úsh jyl buryn balaǵa kompıýter áperip, ınternet ótkizgen bolatyn. Tehnıkanyń arqasynda ol endi dostarymen tildesip, jańa nárselerdi úırene alady», – dep atap ótti vedomstvoda. Festıvalge Aqmola oblysynan oblystyq kezeńniń alty jeńimpazy qatysty.
Oksana Matasova
