Aqmolalyq jaýyngerdiń súıegi 72 jyldan keıin eline jetkizildi

KÓKShETAÝ. QazAqparat - Ekinshi dúnıejúzilik soǵysta qaza tapqan aqmolalyq jaýynger Qamash Bekmuhambetovtyń súıegi 72 jyldan keıin eline jetkizilip, jerlendi, dep habarlaıdy «QazAqparat» HAA tilshisi.

Jaýyngerdiń súıegi ótken jyly Kalınıngrad oblysynyń Bagratıon qalalyq okrýgi aýmaǵynan tabylǵan. Qurylys jumystaryn júrgizip jatqan qurylysshylar aldymen jaýyngerdiń súıegin, odan soń «Qyzyl juldyz» ordenin taýyp alǵan. Keıinirek muraǵat qujattarynan tabylǵan orden nómirine qarap, onyń qyzyl ásker Qamash (shyn aty Qamıdolla)  Bekmuhamedovke berilgendigi anyqtalady. Soǵysta kórsetken erlikteri úshin ol «Jaýyngerlik erligi úshin» medalimen jáne «Qyzyl juldyz» ordenimen marapattalǵan eken. Shyǵys Prýssııa jerin azat etý úshin bolǵan shaıqastardyń birinde habarsyz ketken degen muraǵat qujaty saqtalypty.

Qamash Bekmuhamedov «Qyzyl juldyz» ordenin búginde Kýbanovka atalatyn Gorokýpenen eldi mekenin jaý áskerinen azat etý shaıqasynda kórsetken janqııar erligi úshin alypty.

Týystary erkeletip Qamash atap ketken jaýynger 1917 jyly Eńbekshilder aýdanynda aýyl moldasynyń otbasynda dúnıege kelgen. Ákesi din ókili retinde qýǵynǵa ushyrap, keıin atylady. 1942 jyly ásker qataryna alynyp, qysqa merzimdi daıyndyqtan ótken soń birden maıdanǵa attanady. Týystary keıinirek Ereımentaý aýdanynyń Óleńti aýylyna qonys aýdarǵan. Týra 72 jyl ótkennen keıin jaýyngeri eline jetkizilip, jerlendi. Ulyn kútýmen sarǵaıǵan marqumnyń anasy da 1975 jyly dúnıeden ótken eken.