Aqmolalyq jastar onlaın rejımde kásipkerlermen kezdesti
KÓKShETAÝ. QazAqparat - Aqmola oblysynyń jastar-resýrstyq ortalyǵy jyl saıyn jastarǵa arnalǵan «BASTAU Talks» taqyrybymen qoǵamdyq dáris ótkizip keledi. Bıyl jetinshi ret uıymdastyrylyp otyrǵan shara ZOOM platformasynda onlaın rejımde ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.
Sharaǵa jergilikti bıznesmender men 70-ten astam jas kásipkerler qatysty. Qoǵamdyq dáris jastardy elde bıznes júrgizý múmkindikteri týraly yntalandyrýǵa jáne aqparattandyrýǵa baǵyttalǵan.
Sharany Aqmola oblystyq jastar – resýrstyq ortalyǵynyń jastarmen jumys jáne úılestirý bóliminiń basshysy Turlybek Joldaspaı júrgizip otyrdy.
Aqmola oblysynyń «Atameken» kásipkerler palatasynyń sarapshysy Qurman Seıitov dáris ótkizýdiń mańyzdylyǵyn atap ótti.
«Kóptegen jastar qajetti aqparatqa ıe emes, keıbireýlerinde motıvatsııa nemese egjeı-tegjeıli keńes joq. Aqmola oblysynyń jastar-resýrstyq ortalyǵynyń «BastauTalks» qoǵamdyq dáristerin ótkizýi osyǵan baılanysty», - dedi maman.
Jastarǵa Aqmola oblysy «Atameken» kásipkerler palatasy janyndaǵy Іsker áıelder keńesiniń tóraǵasy, «Nur Otan» partııasy «Kásipker» bastaýysh partııa uıymynyń tóraǵasy Gúlmıra Qadyrmanqyzy, «Alma-Mater» ǵylymı - akademııalyq daǵdylar ortalyǵynyń bas sarapshysy Sáken Qajenov, bıznes tálimger «Bastaý bıznes» jobasynyń qatysýshysy Tımýr Sársenbaev, kásipker, «IndiGo» biregeı bilim stýdııasynyń jáne «Magnet» marketıngtik kompanııasynyń negizin qalaýshy Abylaı Isın jáne «JKBrend» atelesiniń negizin qalaýshy Jibek Ábdrahmanova dáris oqyp, ózderiniń tájirıbelerimen bólisti.
Aıta keteıik, bıyl oblysta 365 jas «Bastaý» jobasy boıynsha bıznesti júrgizý negizderi boıynsha bilimderin jetildirdi.
