Aqmolalyq jastar memlekettik tildi qoldaný aıasyn keńeıtý máselesin talqylady
Taǵylymdy kezdesýge jergilikti joǵary jáne arnaıy orta bilim berý oryndarynyń oqytýshylary men stýdentteri, belsendi jastar qatysty.
Jıyndy ashqan Aqmola oblysy ishki saıasat basqarmasynyń basshysy Gúljanar Shókeeva óz sózinde jastar arasyndaǵy til saıasatyn júrgizýdiń mańyzdylyǵyn atap ótti.
«Elbasy óziniń Joldaýynda: «Qazaqstannyń bolashaǵy - qazaq tilinde», «Qazaq tiliniń basymdyǵy saqtalady. Onyń ári qaraı damýyna zor kóńil bólinedi», dep aıtqan bolatyn. Ótken jylǵy Joldaýynda «Árbir qazaqstandyqtyń elimizdegi ózgerister úderisterine atsalysýy» jóninde naqty aıtylyp, bólek tarmaqpen belgilengen. «Rýhanı jańǵyrý» baǵdarlamasy jappaı qoldaýǵa ıe bolyp, qoǵamdaǵy jańǵyrý úderisterine zor serpin berdi» - degen edi Elbasy. Demek, qoǵam sanasynyń oıanyp, jańa zaman aǵymyna bet burýy baıqalýda. Qazaq tili álipbıin kırıllıtsadan latyn grafıkasyna aýystyrý «Rýhanı jańǵyrýdyń» eń negizigi baǵyty dep aıtýǵa bolady. Sebebi, latyn álipbıi - Uly dala elin álemdik órkenıetpen qabystyratyn altyn kópir», - deıdi basqarma basshysy.
Jıynda Jastar jyly Aqmola oblysynda birqatar jobalar júzege asyrylatyny aıtyldy. Osy oraıda, memlekettik saıasatty halyqaralyq, respýblıkalyq jəne jergilikti deńgeıde júzege asyrýdyń basty baǵyty men jastardyń jan-jaqty damýy týraly Aqmola oblysynyń ishki saıasat basqarmasy jastar saıasaty máseleleri boıynsha bólim basshysy Damır Іrgebaev aıtyp berdi. Ol óz sózinde jastardyń əleýmettik máseleleriniń sheshilýi məselesine toqtaldy.
«2018 jyly tıimdi jumyspen qamtýdy jáne jappaı kəsipkerlikti damytý boıynsha 2017-2021 jyldarǵa arnalǵan baǵdarlamaǵa 5615 adam qatysty. Jyl ishinde eńbekpen qamtý organdary arqyly 4830 jas jumysqa ornalasty. Kókshetaý qalasynda «Aqmola jastary» baǵdarlamasy boıynsha 424 jas otbasyna arnalǵan 6 turǵyn úı salynatyn bolady», - dep atap ótti Damır Іrgebaev.
Budan bólek, jıynda bıylǵy jyly Zerendi aýdanynda Elbasynyń qatysýymen jastardyń jazǵy demalys lageri ótetini, Aqmola jastaryna arnalǵan kitap shyǵarylatyny jáne «Zhas project» jastar korpýsyn damytý jobasyn júzege asyrylatyny da aıtyldy.
Sonymen qatar, kezdesýde jastar tarapynan da memlekettik tildi keńinen qoldaný týraly oılar aıtyldy. Onyń ishinde Kókshetaý tehnıkalyq ınstıtýtynyń kýrsanty Ádilet Serik, J.Mýsın atyndaǵy Kókshetaý joǵary kolledjdiń jastar máselesi komıtetiniń tóraıymy Rázıha Qarbaeva men osy kolledjdiń stýdenti Egor Tıhonov, «Jańa tolqyn» jastar qoǵamdyq birlestiginiń tóraıymy Jaınagúl Qappasova, Kókshetaý qalalyq №1 orta mekteptiń ustazy Oljas Jeńis jáne Shoqan Ýálıhanov atyndaǵy Kókshetaý memlekettik ýnıversıtetiniń stýdenti memlekettik tildiń qoldaný aıasyn keńeıtý týraly óz usynystaryn bildirdi.
