Aqmolalyq volonterler 300-den astam muqtaj janǵa dári-dármek jetkizgen
Ortalyq basshysynyń aıtýynsha, jyl basynan beri oblys boıynsha volonterlermen kóptegen ıgi ister júzege asyryldy. Ásirese, aýa raıynyń qolaısyzdyǵyna baılanysty borandy kúnderi tas joldardyń jabylý sebebinen kólikterdi qutqarý maqsatynda óńirimizdiń volonterleri óz kómekterin aıamady. Máselen, Tselınograd, Atbasar, Ereımentaý aýdandary tárizdi birqatar óńirlerde volonterler erekshe kózge tústi.
«Óńirlik volonterler jáne Aqmola oblysynyń jastar-resýrstyq ortalyǵymen birlesip, ınfektsııanyń taralýyna baılanysty úıden shyqpaýlary úshin 300-den astam úıdi aralap, densaýlyq jaǵdaıyna baılanysty esepte turǵan adamdarǵa qajetti dári-dármekterdi jetkizdi», - deıdi A.Belgibaeva.
Aqmola oblysynyń jastar resýrstyq ortalyǵy jáne Kókshetaý qalasynyń volonterleri turǵyndardyń densaýlyǵyn qaýipti ınfektsııadan qorǵaý úshin saýda úılerinde aqparattyq jumystar júrgizdi. Qala turǵyndaryna vırýstyń aldyn alý sharalary týraly jadynama taratyldy.
«Volonterler kópbalaly jáne az qamtylǵan otbasylarǵa, Uly Otan soǵysynyń ardagerlerine, qalamyzdyń barlyq aýmaǵynda turatyn jalǵyzbasty zeınetkerlerge materıaldyq kómek kórsetti. Karantın bastalǵaly oblystyq volonterlerdi qoldaý ortalyǵynyń músheleri 200-ge jýyq densaýlyǵynda kemistigi bar jalǵyzbasty qarttardy, kópbalaly jáne jaǵdaıy nashar otbasylardy azyq-túlikpen qamtamasyz etti. Qazirgi kezde medıtsınalyq maska tigip, turǵyndarǵa tegin taratýda. Solardyń ishinde Tselınograd, Bulandy aýdandary jáne Kókshetaý qalasynyń volonterleri erekshe kózge tústi. «Lıder kz», «Rahat» jáne taǵy da kóptegen volonterlik uıymdar oblystyq jastar resýrstyq ortalyǵymen birlesip júzege asyrýda», - dedi A.Belgibaeva.
Sonymen qatar, ol óńir volonterleri «Biz birgemiz» aktsııasy sheńberinde de ıgi isterdiń júzege asyrylýyna atsalysyp jatqandyǵyn atap ótti.
