Aqmolalyq trıatlonshylar respýblıkalyq týrnırdiń júldegeri atandy
KÓKShETAÝ. QazAqparat - Aqmolalyq sportshylar Taraz qalasynda ótken bessaıystan Qazaqstan Respýblıkasynyń 5-shi Jastar sport oıyndarynda júldeger atandy, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvonyń málimetinshe, jarys sýda júzý, semserlesý jáne lazer-ran boıynsha ótti. Oǵan qatysqan 18 jasqa deıingi aqmolalyq sportshylar barlyǵy 7 medal ıelendi. Nátıjesinde jalpy komandalyq esepte Aqmola oblysy úzdik úshtikten kórindi. Bul jarystaǵy jeńis, sportshylar úshin aldaǵy jetistikterge jeteleıtin demeý boldy.
«Jarysqa tyńǵylyqty daıyndaldyq. Óńirdiń namysyn laıyqty qorǵaýǵa barymyzdy saldyq. Sol senim men úmitti aqtadyq dep oılaımyn. Bizde bessaıys bóliminiń ashylǵanyna nebári jarty jyl ǵana boldy. Sporttyń bul túrine qyzyǵýshylyq tanytqan sportshylar bizde áli de az. Sondyqtan jarysta óńir namysyn trıatlonshylar qorǵady. Máselen, bessaıystaǵy semserlesýge bizdiń sportshylar 2 aı ǵana daıyndalyp úlgerdi. Dese de, osyndaı joǵary nátıjege qol jetkizdik», - dedi jarys jeńimpazy Anatolıı Golýb.
Atap aıtsaq kásibı turǵyda jalpy óńir boıynsha sporttyń trıatlon túrimen 112 adam aınalysady.
