Aqmolalyq sportshylar strıtlıftıngten Eýropa chempıony atandy
KÓKShETAÝ. QazAqparat – Aqmola oblysynyń eki sportshysy streetlifting boıynsha Eýropa chempıony atandy. Jerlesterimiz eki altyn, bir kúmis jáne eki qola medal ıelendi, dep habarlaıdy QazAqparat tilshisi oblystyq dene shynyqtyrý jáne sport basqarmasyna silteme jasap.
Vedomstvonyń málimetinshe, Máskeý qalasynda strıtlıftıngten (streetlifting) Eýropa chempıonaty ótti. Baıraqty jarysqa Qazaqstan, Reseı, Belarýs, Ýkraına, Chehııa, Estonııa, Aljır, Belgııa, Italııa, Polsha jáne Ulybrıtanııa elderinen barlyǵy 200-ge jýyq sportshy qatysyp baq synady. Onyń ishinde Qazaqstan quramasy atynan barǵan jeti sportshynyń ekeýi Aqmola oblysynan.
«Jarys qorytyndysy boıynsha ulttyq qurama jalpy komandalyq esepte 30 medalmen (onyń ishinde 25 altyn, 2 kúmis jáne 3 qola medal) birinshi oryn aldy. Jerlesimiz Imran Ibragımov qos syryqta syǵymdaý jáne beltemirge tartylý boıynsha jalpy 175 keli esebimen birinshi oryn aldy. Budan bólek, ol halyqaralyq dárejedegi sport sheberi normatıvin oryndady.
Sonymen qatar Damır Ábdirahmanov ta qossyryqta syǵymdaý jáne beltemirge tartylý boıynsha jalpy 150 keli esebimen birinshi oryn aldy. Ol da sport sheberi normatıvin oryndady», - deıdi Aqmola oblystyq dene shynyqtyrý jáne sport basqarmasynyń baspasóz hatshysy Mahabbat Bolshına.
Vedomstvodan atap ótkendeı, aımaq basshysy Ermek Marjyqpaev Eýropa chempıonatynyń jeńimpazy Imran Ibragımov jáne Damır Abdrahmanovpen kezdesip, sportshylardy quttyqtady.
