Aqmolalyq sportshylar bıatl jáne trıatldan álem chempıony atandy
KÓKShETAÝ. QazAqparat - Aqmolalyq sportshylar AQSh-ta ótken bıatl jáne trıatldan álem chempıonatynda úzdik nátıje kórsetip, eki altyn, úsh kúmis jáne eki qola medal ıelendi, dep habarlaıdy QazAqparat tilshisi oblystyq dene shynyqtyrý jáne sport basqarmasynyń baspasóz qyzmetine silteme jasap.
Vedomstvonyń deregi boıynsha, baıraqty jarys AQSh-tyń Florıda shtatynda ótken. Trıatlon men búgingi kúngi bessaıystyń qosyndy sanalatyn jarystyń bul túrine sońǵy kezderi qyzyǵýshylyq artyp keledi.
«Qazaqstan ulttyq quramasy sapynda Aqmola oblysynyń sportshylar Ashraf Kamalov pen Nıkıta Kýrganskıı jasóspirimder arasynda estafetadan chempıon atansa, Arman Qydyrtaev pen Nadejda Bekmaǵambetova kúmis, al, Anastasııa Zaharova men Rashıd Romanchýk tórtinshi orynǵa turaqtady.
Sonymen qatar, jekeleı synǵa túsken Nadejda Bekmaǵambetovaǵa qarsy turar eshkim bolmady. Al, erler arasynda Arman Qydyrtaev pen jasóspirimder arasynda Ashraf Kamalov ekinshi oryn aldy. Jasóspirimder arasynda Nıkıta Kýrganskıı men orta jastaǵy jasópirimder arasynda Rashıd Romanchýk úzdik úshtikke endi», - deıdi Aqmola oblystyq dene shynyqtyrý jáne sport basqarmasynyń baspasóz hatshysy Mahabbat Bolshına.
