Aqmolalyq sportshy paýerlıftıngten Qazaqstan chempıony atandy
KÓKShETAÝ. QazAqparat- Aqmolalyq sportshy Alena Solopova paýerlıftıngten Qazaqstan chempıony atandy, dep habarlaıdy QazAqparat tilshisi oblystyq dene shynyqtyrý jáne sport basqarmasynyń baspasóz qyzmetine silteme jasap.
Vedomstvonyń málimeti boıynsha Almaty oblysynda klassıkalyq paýerlıftıngten Qazaqstan Respýblıkasynyń chempıonaty ótýde. Jarysqa elimizdiń ár óńirinen jınalǵan 200-ge jýyq atlet qatysyp, baq synaýda.
«Kileń myqtylardyń arasynda aqmolalyq paýerlıfterler myqtylyq tanytýda. Jerlesterimiz bir altyn jáne bir kúmis medaldi ıelendi. Onyń ishinde boıjetkender arasynda 52 keli salmaqta synǵa túsken Alena Solopova qarsylas shaq keltirmese, erler arasynda 74 salmaqta Kırıll Starostın kúmis júldege ıe boldy», deıdi vedomstvonyń baspasóz hatshysy Mahabbat Bolshına.
