Aqmolalyq sportshy qyz qoıan-qoltyq urystan álem chempıony atandy
KÓKShETAÝ. QazAqparat - Aqmolalyq sportshy qyz Zarına Qanafına qoıan-qoltyq urystan álem chempıony atandy. Buǵan qosa, aqmolalyqtar el qorjynyna taǵy 3 qola medal saldy, dep habarlaıdy QazAqparat tilshisi Aqmola oblysynyń dene shynyqtyrý jáne sport basqarmasyna silteme jasap.
Vedomstvonyń deregi boıynsha, Reseıdiń Týla qalasynda ótken jarysqa Reseı, Qazaqstan, Belarýs, Grýzııa, Armenııa, Rýmynııa, Ázerbaıdjan, Chehııa, Germanııa tárizdi álemniń 37 elinen jınalǵan 18 jasqa deıingi 300 uldar men qyzdar jáne 21 jasqa deıingi jastar qatysty. Jeńimpazdar 47 salmaq boıynsha anyqtaldy. Qazaqstan quramasy sapynda Aqmola oblystyq balalar men jasóspirimderdiń mamandandyrylǵan sport mektebiniń túlekteri boldy. Onyń ishinde 65 keli salmaqta synǵa túsken Zarına Qanafına jarys ıeleri Reseı jáne Iran eliniń sportshylaryn tize búktirip, álem chempıony atandy.
«Jeńiske jetkenime qýanyshtymyn! Qarsylastarym kileń myqtylar. Jarys aldynda sál qobaljydym. Biraq, jeńis meniń jaǵymda boldy. Jattyqtyrýshym men jankúıerlerimniń qoldaýynyń arqasynda jeńiske jettim», dep qýanyshymen bólisti Z. Qanafına.
Sonymen qatar, Regına Maksımova (60 kg) Gúlnur Myrzataeva (50 kg) jáne Mádı Álıaqparov (36 kg) qola júldeger atandy. Budan bólek Regına Maksımovaǵa jeńiske degen jigeri úshin arnaıy kýbok tapsyryldy.
Aqmolalyq sportshylardy Bekzat Baımuratov, Aslan Zeınollaev, Jaslan Jantasov jáne Darhan Qasymov esimdi bapkerler jattyqtyrady.
