Aqmolalyq sheneýnikter ólgen maldar kómilgen oryndarǵa qatysty túsinik berdi
KÓKShETAÝ. QazAqparat -Tselınograd aýdany Qosshy aýyldyq okrýginiń sheneýnikteri juqpaly aýrýdan ólgen maldardyń kómilgen oryndaryna qatysty turǵyndar suraǵyna jaýap berdi. Sondaı-aq ákimdik ókilderi alynǵan synamalardyń nátıjelerin jarııalady, dep habarlaıdy QazAqparat tilshisi.
Eske sala keteıik, áleýmettik jelilerde Qosshy aýyldyq okrýginiń turǵyndary aýrýdan qyrylǵan maldyń ólekseleri kómilgen topyraqta áli kúnge deıin qaýipti juqpanyń bolýy múmkindigin jazǵan edi.
«Astanadan 2 shaqyrym jerdegi Qosshy aýyldyq okrýgi boıynsha máseleni sheshýdi ótinemiz. Mamyr aıynyń basynda Taıtóbe aýylynda sibir jarasy juqpasyna qatysty topyraqtan synama alyndy. Keıin bul komıssııa osy jerden taǵy da synama aldy. Alaıda, saraptama qorytyndysy jarııalanbady. Bul aýmaqta jer qazý jumystary toqtatyldy. Osy jerde sibir jarasy juqpasyna ushyraǵan maldardyń ólekseleri kómilgen. Sońǵy kezderi aýylda ólgen maldardyń ólekseleri kóbeıip ketken. Olardyń neden ólip jatqany belgisiz. Bul adamdar úshin óte qaýipti, sondyqtan onyń sebepterin anyqtap, zalalsyzdandyrý qajet», - dep jazady Gýlıa Valıeva esimdi áleýmettik jeli qoldanýshysy.
Áıeldiń sózinshe, 50 myńnan astam halqy bar eldi mekenniń 60 paıyzy jer asty kózderinen alynatyn sýdy ishedi. Eger juqpa sý nemese shań arqyly adamdarǵa juqsa arty nasyrǵa shabýy múmkin.
«Bul shynymen de ekologııalyq apat! Bıliktegilerge topyraqtan alynǵan synamalardyń qorytyndysyn jarııalaýdy talap etemiz!», - dep tolyqtyrdy G.Valıeva.
Sheneýnikter bul máselege birden nazar aýdaryp, túsinik berdi.
«Tselınograd aýdany ákiminiń orynbasary B.N.Ábýtálipov Qosshy aýyldyq okrýgi ákiminiń apparatymen, «Tórt túlik» ShJQ MKK jáne jergilikti qaýymdastyq ókilderimen birlesip, maldyń ólekseleri jatqan jerlerdi baryp kórdi. Shara nátıjesinde barlyq ólekseler jınaldy jáne tekserildi. Maldardyń ábden azýynan ólgeni anyqtaldy. Ólekseler arnaıy peshterde órteldi», - dep túsindirdi Qosshy aýyldyq okrýgi ákimdiginen.
Vedomstvonyń málimeti boıynsha, ólgen maldardyń ıelerin anyqtaý jumystary júrgizilýde. Sonyń nátıjesi boıynsha veterınarlyq zańnama buzǵany úshin mal ıeleri ákimshilik nemese qylmystyq jaýapkershilkke tartylatyn bolady.
«Sýdan alynǵan synamaǵa keletin bolsaq, 2018 jyldyń 4 sáýirinde Taıtóbe aýylynyń turǵyndary qoldanyp júrgen sýdan túıneme juqpasyn anyqtaý boıynsha synama alynyp, mıkrobıologııalyq zertteý júrgizildi. 2018 jyldyń 9 sáýirindegi №10-13 zertteý qorytyndysy qaýipti juqpanyń joqtyǵyn anyqtady. Al topyraqtan, ıaǵnı 6 metr tereńdikten 5 synama alynyp, zerthanada bakterıologııalyq, serologııalyq, bıologııalyq jáne genetıkalyq zertteýler júrgizildi. Onyń qorytyndysy boıynsha genetıkalyq ádis arqyly júrgizilgen №2 jáne 4 synamada DNK B.anthracis anyqtaldy. Bul degenimiz buryńǵy tirshilikke qabiletsiz mıkroorganızmderdiń baryn bildiredi. Al bakterıologııalyq, serologııalyq, bıologııalyq zertteýlerde qaýiptiń joqtyǵy anyqtaldy. Qazirgi kezde ereje boıynsha epızootııaǵa qarsy is-sharalar júrgizilýde», - dep túsindirdi Qosshy ákimdiginen.
